കൊല്ക്കത്ത: ലോക്സഭാ തെരഞ്ഞെടുപ്പില് മാത്രമല്ല നിയമസഭാ ഉപതെരഞ്ഞെടുപ്പിലും ബംഗാളില് ബിജെപി തരംഗം. എട്ട് നിയമസഭാ മണ്ഡലങ്ങളിലേക്കുള്ള ഉപതെരഞ്ഞെടുപ്പില് നാല് സീറ്റില് ബിജെപിക്ക് അട്ടിമറി വിജയം. തൃണമൂലിന് മൂന്നും കോണ്ഗ്രസിന് ഒരു സീറ്റും ലഭിച്ചു. ബംഗാളിലെ ബിജെപി മുന്നേറ്റത്തില് ആടിയുലയുകയാണ് തൃണമൂല്.
ഭട്പര, ഡാര്ജലിങ്, ഹബിബ്പൂര്, ഇസ്ലാംപൂര്, കാന്ദി, കൃഷ്ണഗഞ്ച്, നോഡ, ഉലുബേറിയ പര്ബ എന്നിവിടങ്ങളിലാണ് ഉപതെരഞ്ഞെടുപ്പ് നടന്നത്. ഭട്പര മണ്ഡലത്തില് തൃണമൂലിന്റെ മുന് ഗതാഗത മന്ത്രി മദന് മിത്ര തോറ്റു. ബിജെപിയുടെ പവന് കുമാര് സിങ് 23,104 വോട്ടുകള്ക്കാണ് മദന് മിത്രയെ പരാജയപ്പെടുത്തിയത്. പവന്കുമാര് സിങ് 58,119 വോട്ടു നേടിയപ്പോള് 35,015 വോട്ടു മാത്രമാണ് മദന്മിത്രയ്ക്ക് ലഭിച്ചത്.
ഡാര്ജലിങ്ങില് തൃണമൂല് പിന്തുണയോടെ സ്വതന്ത്രനായി മത്സരിച്ച ഗോര്ഖ ടെറിട്ടോറിയല് അഡ്മിനിസ്ട്രഷന് ചെയര്മാന് ബിനോയി തങ്ങിനെ ബിജെപിയുടെ നീരജ് തമങ് സിമ്പ 46,538 വോട്ടുകള്ക്ക് പരാജയപ്പെടുത്തി. ഹബിബ്പൂരില് 30,613 വോട്ടുകളുടെ ഭൂരിപക്ഷത്തിലാണ് ബിജെപിയുടെ ജോയെല് മര്മു വിജയിച്ചത്. കൃഷ്ണഗഞ്ചില് ബിജെപിയുടെ ആഷിഷ് കുമാര് ബിശ്വാസ് 30,866 വോട്ടിന്റെ ഭൂരിപക്ഷത്തില് മണ്ഡലം പിടിച്ചെടുത്തു.
ഉലുബേറിയ പര്ബയിലും ഇസ്ലാംപൂരിലും ബിജെപി രണ്ടാം സ്ഥാനത്തെത്തി. എട്ട് മണ്ഡലങ്ങളിലും കൂടി 40.50 ശതമാനം വോട്ട് ബിജെപി നേടിയപ്പോള് 37.04 ശതമാനമാണ് തൃണമൂലിന് ലഭിച്ചത്. കോണ്ഗ്രസിന് 11.71, സിപിഎമ്മിന് 4.12 ശതമാനവും മാത്രമാണ് ലഭിച്ചത്. ഒരു എംഎല്എ മരിക്കുകയും ഏഴ് എംഎല്എമാര് ലോക്സഭാ തെരഞ്ഞെടുപ്പില് മത്സരിക്കാനായി രാജിവച്ചതിനെത്തുടര്ന്നുമായിരുന്നു ഉപതെരഞ്ഞെടുപ്പ്.
