ചെന്നൈക്ക് തോല്‍വി

മൊഹാലി: ഓപ്പണര്‍ കെ.എല്‍. രാഹുലിന്റെ ബാറ്റിങ് മികവില്‍ അവസാന മത്സരത്തില്‍ കിങ്‌സ് ഇലവന്‍ പഞ്ചാബിന് ജയം. കരുത്തരായ ചെന്നൈ സൂപ്പര്‍ കിങ്‌സിനെ ആറു വിക്കറ്റിന് തോല്‍പ്പിച്ചു. അവസാന മത്സരത്തില്‍ തോറ്റെങ്കിലും പതിനാല് മത്സരങ്ങളില്‍നിന്ന് പതിനെട്ട് പോയിന്റ് നേടിയ ചെന്നൈ നേരത്തെ പ്ലേ ഓഫ് ഉറപ്പിച്ചിരുന്നു. വിജയത്തോടെ പഞ്ചാബ് അവസാന സ്ഥാനത്തുനിന്ന് ആറാം സ്ഥാനത്തേക്കുയര്‍ന്നു. 

സീസണിലെ അവസാന മത്സരം സ്വന്തം മണ്ണില്‍ ആഘോഷമാക്കി പഞ്ചാബ്. വിന്‍ഡീസ് വെടിക്കെട്ട് ബാറ്റ്‌സ്മാന്‍ ക്രിസ് ഗെയിലിനെ ഒരറ്റത്ത് കാഴ്ചക്കാരനാക്കി ഇന്ത്യന്‍ താരം കെ.എല്‍. രാഹുല്‍ തുടക്കം മുതല്‍ തകര്‍ത്തടിച്ചു. 171 റണ്‍സ് പിന്തുടര്‍ന്ന പഞ്ചാബ് ആദ്യ വിക്കറ്റില്‍ 108 റണ്‍സ് കൂട്ടിച്ചേര്‍ത്തു. അടിക്ക് അതേ രീതിയില്‍ തിരിച്ചടിച്ച രാഹുല്‍ പതിനൊന്നാം ഓവറില്‍ പുറത്താകുമ്പോള്‍ ടീം ഏറെക്കുറെ വിജയം ഉറപ്പിച്ചിരുന്നു. രാഹുല്‍ 36 പന്തില്‍ അഞ്ച് സിക്‌സും ഏഴു ഫോറും അടക്കം 71 റണ്‍സ് നേടി. മറുവശത്ത് പതിയ കളിച്ച ഗെയില്‍ തൊട്ടടുത്ത പന്തില്‍ പുറത്തായി. 28 പന്തില്‍ രണ്ട് വീതം സിക്‌സും ഫോറും ഉള്‍പ്പെടെ 28 റണ്‍സാണ് ഗെയില്‍ നേടിയത്. സ്പിന്നര്‍ ഹര്‍ഭജന്‍ സിങ്ങാണ് ഇരുവരെയും പുറത്താക്കിയത്. 

മൂന്നാമനായി കളത്തിലെത്തിയ വിന്‍ഡീസ് യുവതാരം നിക്കോളാസ് പൂരനും താളംകണ്ടെത്തിയതോടെ പഞ്ചാബ് സ്‌കോര്‍ അനായാസം മുന്നോട്ടു നീങ്ങി. പൂരന്‍ 22 പന്തില്‍ മൂന്ന് സിക്‌സും രണ്ട് ഫോറും സഹിതം 36 റണ്‍സ് നേടി ജഡേജക്ക് മുന്നില്‍ വീണു. മായങ്ക് അഗര്‍വാള്‍ ഏഴു റണ്‍സിന് പുറത്തായി. ചെന്നൈക്കായി ഹര്‍ഭജന്‍ സിങ് മൂന്ന് വിക്കറ്റ് വീഴ്‌ത്തി. 

നേരത്തെ ടോസ് നഷ്ടപ്പെട്ട് ആദ്യം ബാറ്റിങ്ങിനിറങ്ങിയ ചെന്നൈ സൂപ്പര്‍ കിങ്‌സ് ഓപ്പണര്‍ ഡുപ്ലെസിസിന്റെ കരുത്തിലാണ് ഭേദപ്പെട്ട സ്‌കോറിലെത്തിയത്. ഡ്യുപ്ലെസിസ് 55 പന്തില്‍ നാല് സിക്‌സും പത്ത് ഫോറും അടക്കം 96 റണ്‍സ് നേടി. ഷെയ്ന്‍ വാട്‌സണ്‍ (ഏഴ്) തുടക്കത്തിലെ പുറത്തായി. രണ്ടാം വിക്കറ്റില്‍ ഡ്യുപ്ലെസിസിനൊപ്പം സുരേഷ് റെയ്‌നയും ഒന്നിച്ചതോടെ ചെന്നൈ സ്‌കോര്‍ മുന്നോട്ട് കുതിച്ചു. റെയ്‌ന 38 പന്തില്‍ രണ്ട് സിക്‌സും അഞ്ച് ഫോറും സഹിതം 53 റണ്‍സ് നേടി. 

പതിനേഴാം ഓവറില്‍ റെയ്‌ന പുറത്തായതോടെയാണ് ചെന്നൈ സ്‌കോര്‍ ഇഴഞ്ഞു തുടങ്ങിയത്. വലിയ സ്‌കോര്‍ മുന്നില്‍ കണ്ട ചെന്നൈയെ സാം കറന്‍-മുഹമ്മദ് ഷാമി സഖ്യം അവസാന ഓവറുകളില്‍ പിടിച്ചുനിര്‍ത്തി. അമ്പാട്ടി റായിഡു (ഒന്ന്), കേദാര്‍ ജാദവ് (പൂജ്യം) എന്നിവര്‍ വന്നപോലെ മടങ്ങി. ധോണി പത്ത് റണ്‍സെടുത്ത് പുറത്താകാതെ നിന്നു. പഞ്ചാബിനായി സാം കറന്‍ മൂന്ന് വിക്കറ്റ് വീഴ്‌ത്തി. ഷാമി നാലോവറില്‍ പതിനേഴ് റണ്‍സിന് രണ്ട് വിക്കറ്റെടുത്തു.      

സ്‌കോര്‍ബോര്‍ഡ്

ചെന്നൈ സൂപ്പര്‍ കിങ്‌സ്

ഫാഫ് ഡ്യുപ്ലെസിസ് ബി കറന്‍ 96, ഷെയ്ന്‍ വാട്‌സണ്‍ ബി കറന്‍ ഏഴ്, സുരേഷ് റെയ്‌ന സി ഷാമി ബി കറന്‍ 53, ധോണി (നോട്ടൗട്ട്) 10, റായിഡു സി മന്ദീപ് സിങ് ബി ഷാമി ഒന്ന്, കേദാര്‍ ജാദവ് ബി ഷാമി പൂജ്യം, ഡ്വെയ്ന്‍ ബ്രാവോ (നോട്ടൗട്ട്) ഒന്ന്, എക്‌സ്ട്രാസ് രണ്ട്, ആകെ ഇരുപതോവറില്‍ അഞ്ച് വിക്കറ്റിന് 170 റണ്‍സ്

വിക്കറ്റ്‌വീഴ്ച: 1-30, 2-150, 3-163, 4-166, 5-167.

ബൗളിങ്: ഹര്‍പ്രീത് ബ്രാര്‍ 3-0-24-0, മുഹമ്മദ് ഷാമി 3-0-17-2, സാം കറന്‍ 4-0-35-3, ആര്‍. അശ്വിന്‍ 4-0-23-0, ആന്ദ്രെ ടൈ 3-0-37-0, എം. അശ്വിന്‍ 3-0-33-0.

കിങ്‌സ് ഇലവന്‍ പഞ്ചാബ്

കെ.എല്‍. രാഹുല്‍ സി ഇമ്രാന്‍ താഹിര്‍ ബി ഹര്‍ഭജന്‍ 71, ക്രിസ്‌ഗെയില്‍ സി ഷോറി ബി ഹര്‍ഭജന്‍ 28, പൂരന്‍ സി ധോണി ബി ജഡേജ 36, അഗര്‍വാള്‍ സി ജഡേജ ബി ഹര്‍ഭജന്‍ ഏഴ്, മന്ദീപ് സിങ് (നോട്ടൗട്ട്) 11, സാം കറന്‍ (നോട്ടൗട്ട്) ആറ്. 

എക്‌സ്ട്രാസ്: 14 ആകെ പതിനെട്ട് ഓവറില്‍ നാല് വിക്കറ്റിന് 173 റണ്‍സ്

വിക്കറ്റ് വീഴ്ച: 1-108, 2-108, 3-118, 4-164.

ബൗളിങ്: ചാഹര്‍ 4-0-28-0, ഹര്‍ഭജന്‍ 4-0-57-3, ബ്രാവോ 4-0-27-0, താഹിര്‍ 4-0-36-0, ജഡേജ 2-0-26-1.