ദുബായ്: ലോകകപ്പ് ക്രിക്കറ്റിലെ ലീഗ് മത്സരങ്ങള്‍ നിയന്ത്രിക്കുന്നതിനുളള അമ്പയര്‍മാരെ പ്രഖ്യാപിച്ചു. ഇന്ത്യാക്കാരനായ സുന്ദരം രവിയും ലോകകപ്പ് നേടിയ ഡേവിഡ് ബൂണ്‍, കുമാര്‍ ധര്‍മ്മസേന, പോള്‍ റീഫല്‍ എന്നിവരും ഉള്‍പ്പെടുന്ന 22 അംഗസംഘമാണ് ലീഗ് മത്സരങ്ങള്‍ നിയന്ത്രിക്കുക. ഇംഗ്ലണ്ടില്‍ മെയ് 30ന് ലോകകപ്പ് ആരംഭിക്കും.
പതിനാറ് അമ്പയര്‍മാരും ആറ് മാച്ച് റഫറിമാരുമാണ് സംഘത്തിലുള്ളത്. ലീഗ് റൗണ്ടില്‍ 48 മത്സരങ്ങള്‍ അരങ്ങേറും. മുപ്പതിന് നടക്കുന്ന ഇംഗ്ലണ്ട്-ദക്ഷിണാഫ്രിക്ക മത്സരം നിയന്ത്രിക്കുന്നത് ലോകകപ്പ് നേടിയ മൂന്ന് പേരുള്‍പ്പെടുന്ന സംഘമാണ്. ഡേവിഡ് ബൂണാണ് മാച്ച് റഫറി, കുമാര്‍ ധര്‍മസേനയാണ് ഒരു ഫീല്‍ഡ് അമ്പയര്‍. പോള്‍ റീഫലാണ് തേര്‍ഡ് അമ്പയര്‍. ബ്രൂസ് ഓക്‌സന്‍ഫോര്‍ഡാണ് മറ്റൊരു ഫീല്‍ഡ് അമ്പയര്‍. ജോയല്‍ വില്‍സണാണ് മത്സരം നിയന്ത്രിക്കുന്ന നാലാമത്തെ ഓഫീഷ്യല്‍.
1987ല്‍ ലോകകപ്പ് നേടിയ ഓസീസ് ടീമില്‍ അംഗമായിരുന്ന ബൂണ്‍. ധര്‍മ്മസേന 1996ല്‍ ലോകകപ്പ് നേടിയ ശ്രീലങ്കന്‍ ടീമംഗമായിരുന്നു. 1999 ല്‍ കപ്പ് നേടിയ ഓസീസ് ടീമില്‍ പോള്‍ റീഫലുണ്ടായിരുന്നു.
ക്രിസ് ബോര്‍ഡ്, ജെഫ് ക്രോ, ആന്‍ഡി പൈക്രോഫ്റ്റ്, രഞ്ജന്‍ മദുഗലെ, റിച്ചി റിച്ചാര്‍ഡ്‌സണ്‍ എന്നിവരാണ് മറ്റ് മാച്ച് റഫറിമാര്‍. അലീം ഡാര്‍, മരിയാസ് എറാസ്മസ്, ക്രിസ് ജഫാനി, ഇയാന്‍ ഗൗഡ്, റിച്ചാര്‍ഡ് ഇല്ലിങ്ങ്‌വര്‍ത്ത്്, റിച്ചാര്‍ഡ് കെറ്റില്‍ബ്രോ, നിജല്‍ ലോങ്, റുചിര പള്ളിഗുരുജ്, റോഡ് ടക്കര്‍, മൈക്കിള്‍ ഗഫ്, പോള്‍ വില്‍സണ്‍, രവി എന്നിവരാണ് മറ്റ് അമ്പര്‍മാര്‍.
രഞ്ജന്‍ മദുഗലെയാണ് പരിചയസമ്പന്നനായ മാച്ച് റഫറി. മദുഗലെയുടെ ആറാം ലോകകപ്പാണിത്. ബോര്‍ഡ്, ക്രോ എന്നിവരുടെ നാലാം ലോകകപ്പും.
സെമിഫൈനലിനുളള അമ്പയര്‍മാരെ ലീഗ് മത്സരങ്ങള്‍ക്ക് ശേഷം പ്രഖ്യാപിക്കും. ഫൈനലിനുള്ള റഫറിമാരെ സെമിഫൈനലിനുശേഷം തെരഞ്ഞെടുക്കുമെന്ന് ഇന്റര്‍നാഷണല്‍ ക്രിക്കറ്റ് കൗണ്‍സില്‍ അറിയിച്ചു.
