കൊച്ചി: കേന്ദ്രടൂറിസം മന്ത്രി അല്ഫോണ്സ് കണ്ണന്താനത്തിന്റെ തെരഞ്ഞെടുപ്പ് പ്രചാരണത്തിനെത്തിയ കേന്ദ്ര വിദേശകാര്യ മന്ത്രി സുഷമാ സ്വരാജ് നിരത്തിയത് നരേന്ദ്ര മോദി ഭരണത്തിന്റെ ഉജ്ജ്വല നേട്ടങ്ങള്. അവിശ്വനുയമായി രാജ്യ വികസനം കുതിക്കുകയാണ്, ലോകരാജ്യങ്ങള് ഇന്ത്യയെ പിന്തുണയ്ക്കുകയാണ്, മാറ്റി നിര്ത്തപ്പെട്ട ഇന്ത്യന് ജനവിഭാഗങ്ങള് പുരോഗമിക്കുകയാണ്, ഇത് തുടരാന് മോദി ഭരണം തുടരാന് പ്രവര്ത്തിക്കുകയാണ് വേണ്ടത്, സുഷമ പറഞ്ഞു. ബിജെപി-എന്ഡിഎ സ്ഥാനാര്തഥികളെ വിജയിപ്പിക്കാന് സുഷമ ആഹ്വാനം ചെയ്തു.
ചുമതലയേറ്റ എല്ലാ ജോലികളിലും കഴിവ് പ്രകടിപ്പിച്ച അല്ഫോണ്സ് കണ്ണന്താനത്തിന്റെ വൈഭവം അദ്ദേഹം ഡിഡിഎ കമ്മീഷണറായിരിക്കെ നേരിട്ടറിഞ്ഞിട്ടുള്ളതാണെന്ന് അദ്ദേഹത്തിന്റെ മന്ത്രാലയത്തിനു കീഴില് ഇന്ത്യ ടൂറിസം മേഖലയില് ലോകത്തെ മൂന്നാംസ്ഥാനത്തെത്തിയെന്നും സുഷമ പറഞ്ഞു.
മൂന്നു മേഖലയിലെ മോദി ഭരണ നേട്ടങ്ങളാണ് സുഷമ വിശദീകരിച്ചത്. രാജ്യ സുരക്ഷയുടെ കാര്യത്തില് മുമ്പുണ്ടായിട്ടില്ലാത്ത പ്രവര്ത്തനം നടത്തി. അത് ലോകരാജ്യങ്ങള് അംഗീകരിക്കുന്നു. ഇസ്ലാമിക രാജ്യങ്ങള് പോലും ഇന്ത്യന് നേട്ടത്തെയും നടപടികളേയും പ്രശംസിക്കുന്നു. പാക്കിസ്ഥാന്റെ നിര്ദ്ദേശം തള്ളി യുഎഇ ഇന്ത്യയെ സ്വീകരിക്കുന്നു. കാരണം ഇത് മോദിയുടെ ഇന്ത്യയാണ്, സുഷമ പറഞ്ഞു.
വികസനത്തിന്റെ കാര്യത്തില് രാജ്യം ഇതുവരെ കണ്ടിട്ടില്ലാത്ത നടപടിയാണുണ്ടായതെന്നതിന് സുഷമ കണക്കുകള് നിരത്തി. വികസന പ്രവര്ത്തനങ്ങള് രാജ്യത്തിന്റെ സാമ്പത്തിക വളര്ച്ചയ്ക്കും തൊഴില്വര്ദ്ധനവിനും എങ്ങനെ സഹായകമായെന്ന് അവര് വിവരിച്ചു. 10 കോടി ശുചിമുറികളുടെ നിര്മാണം രാജ്യത്തെ ശുചിത്വ നിലവാരം എത്ര വര്ദ്ധിപ്പിച്ചുവെന്ന് സുഷമ ചൂണ്ടിക്കാട്ടി.
സര്ക്കാര് സാധാരണക്കാര്ക്ക് നല്കുന്ന സഹായധനത്തിന്റെ മുക്കാലും കീശയിലാക്കുന്ന ഇടനിലക്കാരെ ഇല്ലാതാക്കിയതും ചൂഷണം തടഞ്ഞതും കേന്ദ്രമന്ത്രി വിശദീകരിച്ചു. 34 കോടി പേര്ക്കാണ് പുതിയതായി ബാങ്ക് അക്കൗണ്ടുകള് തുടങ്ങിയത്. ഇതുവഴി ഇടനിലക്കാരെ ഇല്ലാതാക്കി. ഡിജിറ്റല് ഇന്ത്യയിലേക്കുള്ള വളര്ച്ചയില് വലിയ കുതിപ്പുണ്ടായി. ഈ സര്ക്കാര് അധികാരത്തിലെത്തുമ്പോള് 59 ഗ്രാമങ്ങളില് മാത്രമായിരുന്ന ഒപ്റ്റിക്കല് ഫൈബര് വിന്യാസം, ഇപ്പോള് ഒരുലക്ഷത്തി പതിനാറായിരം ഗ്രാമത്തിലെത്തി. രണ്ട് മൊബൈല് ഫോണ് നിര്മാണ ഫാക്ടറികളേ ഉണ്ടായിരുന്നുള്ളു, ഇപ്പോള് 127 എണ്ണമുണ്ട്. കേരളത്തില് ആറ് പുതിയ പാസ്പോര്ട്ട് സേവാ കേന്ദ്രം തുറന്നുതുള്പ്പെടെ രാജ്യത്തിപ്പോള് 505 പാസ്പോര്ട്ട് കേന്ദ്രങ്ങളായി, സുഷമാ സ്വരാജ് വിശദീകരിച്ചു.
സാമ്പത്തിക രംഗത്ത് രാജ്യത്തിന്റെ വളര്ന്ന വന്കുതിച്ചു ചാട്ടം സുഷമ വിവരിച്ചു. വിദ്യാഭ്യാസ രംഗത്ത്, ആരോഗ്യ മേഖലയില് ഉണ്ടായ വളര്ച്ച മന്ത്രി വിശദമാക്കി.
ശബരിമല വിഷയത്തില് സംസ്ഥാന സര്ക്കാരിനേയും സിപിഎമ്മിനേയും കോണ്ഗ്രസിനേയും രൂക്ഷമായി വിമര്ശിച്ച സുഷമ, വിശ്വാസികള്ക്കൊപ്പം നിന്നത് ബിജെപി മാത്രമാണെന്ന് പറഞ്ഞു. വിശ്വാസ സംരക്ഷണത്തിന് മര്ദ്ദനമേറ്റ, ജയിലില് പോയ പ്രവര്ത്തകരെ അവര് അഭിനന്ദിച്ചു. സുരേന്ദ്രന്, ശോഭാ സുരേന്ദ്രന്, യുവമോര്ച്ച നേതാവ് പ്രകാശ് ബാബു തുടങ്ങിയവര്ക്കെതിരേ നൂറിലേറെ കേസുകളെടുത്ത നടപടിയെ കേന്ദ്രമന്ത്രി വിമര്ശിച്ചു.
ശബരിമല അയ്യപ്പന്റെ പേരു പറഞ്ഞതിന് സുരേഷ് ഗോപിക്ക് തെരഞ്ഞെടുപ്പു കമ്മീഷന് നോട്ടീസയച്ചതിനെ സുഷമ അപലപിച്ചു. ആരാധിക്കുന്ന ഗുരുവിന്റെ പേരുപറയാന് പറ്റാത്ത എന്തു തെരഞ്ഞെടുപ്പ് ചട്ടമാണെന്ന് അവര് ചോദിച്ചു.
ഇത്തരം ശക്തികളെയും സര്ക്കാരുകളേയും പിഴുതെറിയണം. അതിനുള്ള അവസരമാണ് വന്നിരിക്കുന്നത്. അധ്വാനമൊന്നും ഏറെ വേണ്ട, ഏപ്രില് 23 ന് വോട്ടെടുപ്പ് ദിവസം താമചിഹ്നത്തിനു നേരേ വിരല് അമര്ത്തിയാല് മാത്രംമതി, സുഷമാ സ്വരാജ് ഓര്മിപ്പിച്ചു.
