ന്യൂദല്ഹി: റഷ്യയുടെ പരമോന്നത സിവിലിയന് പുരസ്കാരമായ ഓഡര് ഓഫ് സെയ്ന്റ് ആന്ഡ്രു പുരസ്കാരം പ്രധാനമന്ത്രി നരേന്ദ്ര മോദിയ്ക്ക്. ഇന്ത്യയും റഷ്യയും തമ്മിലുള്ള നയതന്ത്രബന്ധം മെച്ചപ്പെടുത്തിയതിന്റെ അടിസ്ഥാനത്തിലാണ് മോദിക്ക് പരമോന്നത പുരസ്കാരം നല്കാന് തീരുമാനിച്ചത്.
റഷ്യന് പ്രസിഡന്റ് വ്ളാദിമിര് പുടിനാണ് ഈ പുരസ്കാരം നല്കാനുള്ള ഉത്തരവില് ഒപ്പു വച്ചിരിക്കുന്നത്. എന്നാണ് ഈ പുരസ്കാരം മോദിക്ക് നല്കുക എന്ന കാര്യം വ്യക്തമല്ല.
റഷ്യ രാജഭരണത്തിന് കീഴിലായിരുന്ന കാലത്ത് 1698-ലാണ് ഈ സിവിലിയന് പുരസ്കാരം നല്കുന്നത് ആരംഭിക്കുന്നത്. സോവിയറ്റ് ഭരണകാലത്ത് ഈ പുരസ്കാരം നിരോധിക്കപ്പെട്ടിരുന്നു. എന്നാല് സോവിയറ്റ് ഭരണം വീണതിന് ശേഷം ഈ പുരസ്കാരം തിരികെ കൊണ്ടുവരികയായിരുന്നു.
ഈ തെരഞ്ഞെടുപ്പ് കാലത്ത് ഇത് രണ്ടാം തവണയാണ് ഒരു പരമോന്നത പുരസ്കാരം മോദിയെ തേടിയെത്തുന്നത്. നേരത്തേ യുഎഇയുടെ പരമോന്നത സിവിലിയന് പുരസ്കാരവും പ്രധാനമന്ത്രിയെ തേടിയെത്തിയിരുന്നു. ഈ മാസം അവസാനം ആ പുരസ്കാരം നേരിട്ട് വാങ്ങാന് മോദിയെത്തുമെന്നാണ് ആദ്യം പറഞ്ഞിരുന്നതെങ്കിലും തെരഞ്ഞെടുപ്പ് ചട്ടലംഘനമായേക്കാം എന്നതിനാല് ഈ തീരുമാനം റദ്ദാക്കിയിരുന്നു.
