ആര്‍പ്പൂക്കര: ഒരു ദേശത്തിന്റെ കൂട്ടായ്‌മയില്‍ രൂപപ്പെട്ട ജനകീയ ചുണ്ടന്‍ ആര്‍പ്പൂക്കര ചുണ്ടന്‍ വള്ളം ആഗസ്ത് രണ്ടിന് നീരണിയും. ഉച്ചയ്‌ക് 12.5നും 12 30 നും ഇടയ്‌ക്കുള്ള മുഹൂര്‍ത്തത്തിലാണ് ചുണ്ടന്‍ നീരണിയുന്നത്. ആര്‍പ്പൂക്കരയിലെ വള്ളംകളി പ്രേമികളുടെ കൂട്ടായ്‌മയിലാണ് ആര്‍പ്പൂക്കരയ്‌ക്ക് ഒരു ചുണ്ടന്‍ എന്ന ആശയം ഉടലെടുത്തത്.
പൊതുവെ ജലാശയങ്ങളുമായി ബന്ധപ്പെട്ടു ജീവിക്കുന്ന സാധാരണക്കാരുടെയും കര്‍ഷകരുടെയും കര്‍ഷക തൊഴിലാളികളുടെയും നാടാണ് ആര്‍പ്പൂക്കര. ജലമേള എന്നു കേട്ടാല്‍ അവര്‍ക്ക് എന്നും ഹരമാണ്. വള്ളംകളിയും, കളിവള്ളങ്ങളും അവരെ ആവേശം കൊള്ളിക്കുന്നു. അതു കൊണ്ടു കൂടിയാണ് ആര്‍പ്പൂക്കരയ്‌ക്ക് ഒരു ചുണ്ടന്‍ എന്ന ആശയം വളരെ വേഗം അവരിലേയ്‌ക്ക് എത്തിയത്. തുടര്‍ന്ന് ജനകീയ കൂട്ടായ്‌മ രൂപീകരിച്ചു കൊണ്ട് കളിവള്ള നിര്‍മ്മാണത്തിന് തുടക്കം കുറിച്ചു.
വള്ളം നിര്‍മ്മിക്കുന്നതിന് തച്ചനെ ക്ഷണിച്ചു വരുത്തുകയും പാലാ പൂഞ്ഞാര്‍ തുടങ്ങിയ സ്ഥലങ്ങളില്‍ നിന്ന് ആഞ്ഞിലിത്തടി ശേഖരിക്കുകയും ചെയ്തു. നിരവധി ജലോത്സവ പ്രേമികളില്‍ നിന്ന് 5000 രൂപ മൂല്യമുള്ള ഓഹരികള്‍ സ്വരൂ പിച്ചാണ് വള്ളം നിര്‍മാണ ഫണ്ട് കണ്ടെത്തിയത്. കഴിഞ്ഞ ആറുമാസത്തലേറെയായി വള്ളത്തിന്റെ നിര്‍മ്മാണ പ്രവര്‍ത്തനങ്ങള്‍ തുടങ്ങിയിട്ട്.
ആര്‍പ്പൂക്കര കരിപ്പൂത്തട്ടിന് സമീപം നെല്ലറ പാലത്തിന് സമീപമാണ് ഇപ്പോള്‍ വള്ളം നിര്‍മാണം നടക്കുന്നത്. ഇവിടുത്തെ തോട്ടിലാണ് ആര്‍പ്പൂക്കര ചുണ്ടന്റെ നീരണിയല്‍ നടക്കുന്നത്. നീരണിയല്‍ ചടങ്ങിനായുള്ള അവസാനഘട്ട ഒരുക്കങ്ങള്‍ പുരോഗമിക്കുകയാണ്.
