ശ്രീനഗര്: ജമ്മുകശ്മീരിലെ കിഷ്ത്വാറില് ആര്എസ്എസ് പ്രാന്ത സേവാപ്രമുഖ് ചന്ദ്രകാന്ത ശര്മയെ ഭീകരര് വെടിവച്ചുകൊലപ്പെടുത്തി. ഭീകരരുടെ വെടിവയ്പ്പില് അദ്ദേഹത്തിന്റെ അംഗരക്ഷകനും കൊല്ലപ്പെട്ടു. ഒരു പോലീസ് ഉദ്യോഗസ്ഥന് ഗുരുതരമായി പരിക്കേറ്റു. ഉച്ചയ്ക്ക് പന്ത്രണ്ടരയോടെ കിഷ്ത്വാര് ആശുപത്രിയിലാണ് സംഭവം.
ആശുപത്രിയിലെ മെഡിക്കല് അസിസ്റ്റന്റായ ശര്മ്മയെ, കെട്ടിസമുച്ചയത്തില് കടന്നുകയറിയ ഭീകരര് അംഗരക്ഷകന്റെ തോക്ക് പിടിച്ചുവാങ്ങി വെടിവയ്ക്കുകയായിരുന്നു. വെടിയേറ്റ ചന്ദ്രകാന്ത് ശര്മയെ ഹെലിക്കോപ്ടറില് ജമ്മു മെഡിക്കല് കോളേജിലേക്ക് കൊണ്ടുപോയെങ്കിലും വഴിമധ്യേ ജീവന് പൊലിയുകയായിരുന്നു.
ശര്മയെ രക്ഷിക്കാന് ശ്രമിക്കവേ സ്വയം വെടിയുണ്ടകള് ഏറ്റുവാങ്ങിയാണ് അംഗരക്ഷകന് കൊല്ലപ്പെട്ടത്. ഏതാനും മാസങ്ങള്ക്കു മുന്പാണ് ഇവിടെ ആര്എസ്എസ്, ബിജെപി നേതാക്കളായ സഹോദരങ്ങളെ (അനില് പരിഹാര്, അജിത് പരിഹാര്) ഭീകരര് വെടിവച്ചുകൊന്നത്. ശര്മ്മയ്ക്കും ഭീഷണിയുണ്ടായിരുന്നു.
സംഭവത്തെത്തുടര്ന്ന് സ്ഥലത്ത് വന് പോലീസ് ക്യാമ്പാണ്. കിഷ്ത്വാറില് കര്ഫ്യൂവും പ്രഖ്യാപിച്ചു. ഭീകരരെ കണ്ടെത്താന് പോലീസ് വ്യാപകമായി തെരച്ചിലാരംഭിച്ചു. അക്രമമുണ്ടാകാതിരിക്കാന് സൈന്യത്തെ നിയോഗിച്ചിട്ടുമുണ്ട്. ഉദ്ധംപൂര് ലോക്സഭാ മണ്ഡലത്തിലാണ് കിഷ്ത്വാര്. ഏപ്രില് 18നാണ് ഇവിടെ തെരഞ്ഞെടുപ്പ്. കേന്ദ്രമന്ത്രി ജിതേന്ദ്ര സിങ്ങാണ് ഇവിടെ ബിജെപി സ്ഥാനാര്ഥി.
