ഭുവനേശ്വര്: കുടുംബവാഴ്ചയില് നിന്നോ പണത്തില് നിന്നോ അല്ല പ്രവര്ത്തകരുടെ വിയര്പ്പില് നിന്നുയര്ന്ന് വന്നതാണ് ബിജെപിയെന്ന് പ്രധാനമന്ത്രി നരേന്ദ്ര മോദി. സങ്കല്പിക്കാന് പോലും കഴിയാത്ത മേഖലകളില് ഇന്ന് ഭാരതീയ ജനതാ പാര്ട്ടിയുടെ പതാക ഉയര്ന്നു പറക്കുകയാണെന്നും അദ്ദേഹം പറഞ്ഞു. ഒഡീഷയിലെ വിവിധ കേന്ദ്രങ്ങളില് നടന്ന തെരഞ്ഞെടുപ്പ് പ്രചാരണ റാലിയില് സംസാരിക്കുകയായിരുന്നു അദ്ദേഹം.
തലമുറകളായി പട്ടിണി നിര്മാര്ജനമെന്ന മുദ്രാവാക്യം മാത്രമേ കോണ്ഗ്രസ്സിനുള്ളു. അതിനായി നടപടികളൊന്നും തന്നെ കൈക്കൊണ്ടിട്ടില്ല. മറിച്ച് ജനങ്ങള് പാവപ്പെട്ടവരും നേതാക്കന്മാര് പണക്കാരുമായി. പത്ത് കൊല്ലത്തോളം ഒഡീഷയിലെ ജനങ്ങള് പട്ടിണിയില് മുങ്ങിക്കിടക്കുകയായിരുന്നു. ഈ സാഹചര്യം മുതലെടുത്തത് മാവോയിസ്റ്റുകളാണ്- മോദി പറഞ്ഞു.
ലോകത്തിലെ ഏറ്റവും വലിയ രാഷ്ട്രീയ പ്രസ്ഥാനമാണ് ബിജെപി. കുടുംബമഹിമയുടെയോ പണക്കൊഴുപ്പിന്റെയോ സഹായം കൊണ്ടോ അല്ല, സ്വയം വളര്ച്ച കൈവരിച്ച രാജ്യത്തെ ഏക പാര്ട്ടിയുമാണത്. കോണ്ഗ്രസ്സിനും കോണ്ഗ്രസ്സില് നിന്നുരുത്തിരിഞ്ഞ പാര്ട്ടികള്ക്കും ശക്തമായ ബദലായി മാറിയിരിക്കുകയാണ് ഇന്ന് ഈ പ്രസ്ഥാനം. ഇവിടെ സത്യസന്ധവും തത്വദീക്ഷയുള്ളതും വികസനത്തില് പ്രതിജ്ഞാബദ്ധവുമായ ഒരു സര്ക്കാര് വേണോ, അഴിമതി നിറഞ്ഞതും തത്വദീക്ഷയില്ലാത്തതുമായ ഒരു സര്ക്കാര് വേണമോ എന്ന് ഒഡീഷയിലെ ജനങ്ങള് തീരുമാനിക്കണം. സംസ്ഥാന സര്ക്കാര് അഴിമതിമുക്തമായാല് മാത്രമേ ഭരതത്തിന്റെ ചൗക്കീദാറിന് തന്റെ എല്ലാ വാഗ്ദാനങ്ങളും പാലിക്കാന് കഴിയൂ.
ഒഡീഷയില് ഇത്തവണ പരമാവധി താമരകള് വിരിയുമെന്ന് തനിക്ക് ഉറപ്പുണ്ടെന്നും മോദി പറഞ്ഞു. ബിജെപി ഇവിടെ വിജയത്തിന്റെ രുചി അറിയും. ഒഡീഷയില് വിജയിക്കുന്നതോടൊപ്പം തന്നെ കേന്ദ്രത്തിലും ബിജെപി അധികാരത്തില് വരും. ശക്തവും സ്ഥിരതയുമുള്ള രാജ്യത്തിന്റെ സുരക്ഷിതത്വം ഉറപ്പാക്കുന്ന ഒരു സര്ക്കാരിനെയാണ് രാജ്യത്തിനാവശ്യം, അദ്ദേഹം കൂട്ടിച്ചേര്ത്തു.
ഒഡീഷയില് ഏപ്രില് 11, 18, 23, 29 തീയതികളിലായി നടക്കുന്ന ലോക്സഭാ തെരഞ്ഞെടുപ്പിനോടൊപ്പമാണ് നിയമസഭാ തെരഞ്ഞെടുപ്പും.
