സംസ്ഥാനത്തെ ഏറ്റവും വലിയ ലോക്സഭാ മണ്ഡലമായ ഇടുക്കി പിടിക്കാന് അരയും തലയും മുറുക്കി ഇറങ്ങിയിരിക്കുകയാണ് എന്ഡിഎ. തൊടുപുഴ സ്വദേശിയായ ബിഡിജെഎസ് നേതാവ് ബിജു കൃഷ്ണന് നാട്ടിലുള്ള വ്യക്തി ബന്ധങ്ങളും വോട്ടായി മാറുമെന്ന് പാര്ട്ടി കണക്ക് കൂട്ടുന്നു. കാര്ഷിക മണ്ഡലമായ ഇടുക്കിയെ ‘മിടുക്കി’യെന്ന് വാഴ്ത്തിപ്പാടുമ്പോഴും പ്രകൃതി ദുരന്തത്തില് മുറിവേറ്റ മലയോര ജനതയുടെ മനസ് മാറ്റത്തിനായി നീറി പുകയുകയാണെന്ന് എന്ഡിഎ സ്ഥാനാര്ത്ഥിക്ക് ലഭിക്കുന്ന ഓരോ സ്വീകരണങ്ങളും വ്യക്തമാക്കുന്നു.
സര്ക്കാര് അനാസ്ഥയില് സംഭവിച്ച പ്രളയത്തില് തകര്ന്ന മലയോര മേഖലയില് പുനര്നിര്മാണത്തിലും സര്ക്കാരിന്റെ ഗുരുതര വീഴ്ച സജീവ ചര്ച്ചയാണ്. ഏറെ പ്രതിഷേധങ്ങള്ക്ക് ശേഷമാണ് പേരിനൊരു പാക്കേജ് പോലും പ്രഖ്യാപിച്ചത്. തകര്ന്ന വീടുകള്, റോഡുകള്, കൃഷി എന്നിവയുടെ കണക്കുകള് കേന്ദ്രത്തിന് കൈമാറാതെ രാഷ്ട്രീയ ലാഭം ഉണ്ടാക്കാനാണ് നീക്കം നടന്നത്. ഇതിന്റെ പരിണത ഫലമാണ് എട്ട് കര്ഷകരുടെ ആത്മഹത്യ. ആത്മഹത്യകള് അറിഞ്ഞില്ലെന്ന് പറയുന്ന ഇടതു സര്ക്കാരിന്റെ കര്ഷക വിരുദ്ധ നിലപാട് എടുത്ത് പറഞ്ഞാണ് ബിജു കൃഷ്ണന് വോട്ട് തേടുന്നത്. അയ്യപ്പഭക്തര് ഏറെയുള്ള ഇടുക്കി പാര്ലമെന്റ് മണ്ഡലത്തില് ശബരിമല വിഷയവും ചര്ച്ചയാണ്.
ജില്ലയിലെ തോട്ടം തൊഴിലാളി പ്രശ്നങ്ങള്, അടഞ്ഞ് കിടക്കുന്ന ഫാക്ടറികള്, കുടിവെള്ളം, അടിസ്ഥാന സൗകര്യങ്ങള് എന്നിവയെല്ലാം ചര്ച്ചയാവുന്നു. ഒപ്പം തമിഴ്നാട് അതിര്ത്തിമേഖലയിലെ എഐഡിഎംകെയുടെ പിന്തുണയും എന്ഡിഎയ്ക്ക് കരുത്താകും.
സിറ്റിങ് എംപി ജോയ്സ് ജോര്ജിനെ ഇടത് പക്ഷം സ്വതന്ത്രനായി തന്നെ അവതരിപ്പിക്കുമ്പോള് യുഡിഎഫിനു വേണ്ടി ഡീന് കുര്യാക്കോസ് വീണ്ടും മത്സരിക്കുന്നു.
തൊടുപുഴ, ദേവികുളം, ഇടുക്കി, ഉടുമ്പന്ചോല, പീരുമേട്, മൂവാറ്റുപുഴ, കോതമംഗലം എന്നീ നിയമസഭ മണ്ഡലങ്ങളാണ് ഇടുക്കിയുടെ പരിധിയില് വരുന്നത്.
2014ല് നിന്ന് 2016ലെ നിയമസഭാ തെരഞ്ഞെടുപ്പിലെത്തിയപ്പോള് 1.5 മടങ്ങ് വോട്ട് വര്ധിപ്പിച്ച് 1.24 ലക്ഷം കടന്നിരുന്നു എന്ഡിഎ. 2016ല് തൊടുപുഴയും ഇടുക്കിയും ഒഴികെയുള്ള നിയോജക മണ്ഡലങ്ങള് ഇടത് പക്ഷത്തിനൊപ്പം നിന്നപ്പോള് വോട്ടിന്റെ കാര്യത്തില് വലിയ മുന്നേറ്റമാണ് എന്ഡിഎ നടത്തിയത്. 90 ശതമാനവും കാര്ഷിക ജോലി ചെയ്യുന്നവരുപ്പെടുന്ന നാല് നിയമസഭാ മണ്ഡലങ്ങളാണ് വിജയ പരാജയങ്ങളില് നിര്ണായക സ്വാധീനം ചെലുത്തുന്നത്. പുതുക്കിയ വോട്ടര് പട്ടിക അനുസരിച്ച് പുതിയ 18,680 പേരടക്കം 11,76,099 വോട്ടര്മാരാണ് ഇടുക്കിയിലുള്ളത്.
ജന്മഭൂമി ഓണ്ലൈന്