കണ്ണൂര്: കേരളത്തിലെ ജന വിരുദ്ധരും രാഷ്ട്ര വിരുദ്ധരുമായ ഇടത്-വലത് മുന്നണികളെ ആസന്നമായ ലോക്സഭാ തെരഞ്ഞടുപ്പില് സംസ്ഥാനത്തെ ജനങ്ങള് പാഠം പഠിപ്പിക്കുമെന്ന് ബിജെപി ദേശീയ സെക്രട്ടറി വൈ.സത്യകുമാര് പറഞ്ഞു. കണ്ണൂര് ലോക്സഭാ മണ്ഡലം എന്ഡിഎ സ്ഥാനാര്ത്ഥി സി.കെ.പത്മനാഭന്റെ തെരഞ്ഞെടുപ്പ് കമ്മിറ്റി രൂപീകരണവും കണ്വെന്ഷനും കണ്ണൂര് സ്റ്റേഡിയം പവലിയനില് ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. ദേശീയവാദികളെ വിജയിപ്പിക്കണമോ ദേശവിരുദ്ധരെ വിജയിപ്പിക്കണമോയെന്നതാണ് തെരഞ്ഞെടുപ്പിലുയരുന്ന ചോദ്യം.
കേരളത്തില് പരസ്പരം മത്സരിക്കുന്ന സിപിഎമ്മും കോണ്ഗ്രസും കേരളത്തിന് പുറത്ത് മാഹിയിലും കര്ണ്ണാടകയും തമിഴ്നാടും ഉള്പ്പെടെ രാജ്യത്തെ ഒട്ടുമിക്ക സംസ്ഥാനങ്ങളിലും ഒറ്റ മുന്നണിയായി മത്സരിക്കുകയാണ്. എന്ത് വൃത്തകെട്ട രാഷ്ട്രീയവും കളിച്ച് നരേന്ദ്രമോദിയെ താഴെയിറക്കാന് കച്ചകെട്ടിയിറങ്ങിയിരിക്കുകയാണ് ഇടതുപക്ഷവും കോണ്ഗ്രസുമടക്കമുളള പ്രതിപക്ഷ കക്ഷികള്.
മോദിയെ എതിര്ക്കുകയെന്ന ഒരൊറ്റ അജണ്ടയാണ് ഇക്കൂട്ടര്ക്കുളളത്. ഇതുവഴി രാജ്യത്തെ ദുര്ബലപ്പെടുത്തുകയാണ് ഇവരുടെ ലക്ഷ്യം. എന്നാല് ആര് എന്തൊക്കെ ചെയ്താലും രാജ്യത്ത് വിപ്ലവകരമായ മാറ്റങ്ങള്ക്കും പദ്ധതികള്ക്കും പരിഷ്ക്കാരങ്ങള്ക്കും നേതൃത്വം നല്കിയ നരേന്ദ്രമോദിയുടെ നേതൃത്വത്തില് വരുന്ന മെയ് 23 ന് വന് ഭൂരിപക്ഷത്തോടെ എന്ഡിഎ സര്ക്കാര് വീണ്ടും അധികാരത്തിലെത്തുമെന്നും അദ്ദേഹം പറഞ്ഞു.
യുപിഎ ഭരണത്തില് അഴിമതിയും കുഭകോണവും തൊഴിലില്ലായ്മയും പണപ്പെരുപ്പവും മൂലം സാമ്പത്തിക പ്രതിസന്ധിയില്പ്പെട്ടുഴലുന്ന സാഹചര്യത്തിലാണ് മോദി ഭാരതത്തിന്റെ ഭരണം ഏറ്റെടുത്തത്. എന്നാല് മോദി ഇന്ന് രാജ്യത്തെ ലോകം ആദരിക്കുന്ന നിലയിലെത്തിച്ചിരിക്കുകയാണ്. ലോകത്തെ അഞ്ചാമത്തെ സാമ്പത്തിക ശക്തിയായി ഭാരതം മാറിക്കഴിഞ്ഞു. പണപ്പെരുപ്പം ഏറ്റവും കുറഞ്ഞ നിലയിലെത്തി. ജിഡിപി നിരക്ക് ഉയര്ന്നു.
ഗ്രാമീണ മേഖലയില് ലക്ഷകണക്കിന് രൂപയുടെ വികസനം നടപ്പിലാക്കി. റോഡ്, റെയില് ഗതാഗതരംഗത്ത് വന് കുതിച്ചുചാട്ടമാണ് കഴിഞ്ഞ 5 വര്ഷത്തിനിടെ നടന്നത്. എല്ലാ വിഭാഗം ജനങ്ങളേയും സ്പര്ശിക്കുന്ന വികസനമാണ് രാജ്യത്ത് ഉണ്ടായത്. കര്ഷകര്ക്കും ദരിദ്രര്ക്കും വേണ്ടി നിരവധി പദ്ധതികള് കൊണ്ടുവന്നു. 6000രൂപ കര്ഷകരുടെ അക്കൗണ്ടിലേക്ക് നല്കുന്ന പദ്ധതി, പ്രധാനമന്ത്രി ആവാസ് യോജന, ആയുഷ്മാന് ഭാരത് ഇന്ഷൂറന്സ് പദ്ധതി തുടങ്ങി നിരവധി പദ്ധതികള് കേന്ദ്ര സര്ക്കാര് നടപ്പിലാക്കി.
എന്നാല് കേരളത്തിലെ സര്ക്കാര് ആയുഷ്മാന് ഭാരത് പദ്ധതിയടക്കം നടപ്പിലാക്കുന്നതില് സംസ്ഥാനത്തെ എല്ഡിഎഫ് സര്ക്കാര് വിമുഖത കാട്ടി. മുദ്രായോജനയുള്പ്പെടെയുളള പദ്ധതികളിലൂടെ ലക്ഷക്കണക്കിന് അഭ്യസ്തവിദ്യരായ യുവാക്കള് സംരംഭങ്ങള് ആരംഭിച്ചു. എന്നാല് വികസന നയങ്ങളും ജനകീയ പ്രശ്നങ്ങളും ചര്ച്ചചെയ്യാന് തയ്യാറാവാത്ത കോണ്ഗ്രസും സിപിഎമ്മും അപവാദങ്ങള് പ്രചരിപ്പിച്ച് വോട്ട് നേടാന് ശ്രമിക്കുകയാണെന്നും അദ്ദേഹം പറഞ്ഞു. ഉത്തരേന്ത്യയിലെ കര്ഷക ആത്മഹത്യകളെ പര്വ്വതീകരിച്ച് കാണിക്കുന്ന ഇടത്-വലത് മുന്നണികള് കഴിഞ്ഞ എട്ട് വര്ഷത്തിനകം വയനാട്ടിലും കേരളത്തിലും നടന്ന കര്ഷക ആത്മഹത്യകളെക്കുറിച്ച് മൗനം പാലിക്കുകയാണെന്നും അദ്ദേഹം പറഞ്ഞു.
ബിജെപി ജില്ലാ പ്രസിഡണ്ട് പി.സത്യപ്രകാശ് അധ്യക്ഷത വഹിച്ചു. എന്ഡിഎ ലോക്സഭാ മണ്ഡലം സ്ഥാനാര്ത്ഥി സി.കെ.പത്മനാഭന്, ബിഡിജെഎസ് ജില്ലാ പ്രസിഡണ്ട് വി.പി.ദാസന്, ബിജെപി സംസ്ഥാന സെല് കോഡിനേറ്റര് കെ.രഞ്ജിത്ത്, കെ.വി.അജി (ബിഡിജെഎസ്), വര്ക്കി വട്ടപ്പാറ (കേരള കോണ്ഗ്രസ്), എം.പി.ജോയി (സോഷ്യലിസ്റ്റ് ജനതാദള്), പി.കെ.അയ്യപ്പന് മാസ്റ്റര് (എല്ഐപി), കൊറ്റിയാല് കൃഷ്ണന് (പ്രജാ സോഷ്യലിസ്റ്റ് പാര്ട്ടി), എം.എന്.ഗിരി (നാഷണലിസ്റ്റ് കോണ്ഗ്രസ്), ബി.ഡി.ബിന്റോ എന്നിവര് സംസാരിച്ചു.
ബിജെപി മേഖലാ വൈസ് പ്രസിഡണ്ട് എം.പി.ഗംഗാധരന്, കേരള കോണ്ഗ്രസ് സംസ്ഥാന ജനറല് സെക്രട്ടറി ജയിംസ് പന്നിമാക്കല്, സോഷ്യലിസ്റ്റ് ജനതാദള് ജില്ലാ പ്രസിഡണ്ട് ജിജിതോമസ്, ബിജെപി ജില്ലാ ജനറല് സെക്രട്ടറി കെ.കെ.വിനോദ് കുമാര്, ദേശീയ സമിതി അംഗം പി.കെ.വേലായുധന്, സംസ്ഥാന സമിതി അംഗങ്ങളായ എ.ദാമോദരന്, വി.വി.ചന്ദ്രന്, ബിജെപി ജില്ലാ ഭാരവാഹികളായ പി.ബാലകൃഷ്ണന് മാസ്റ്റര്, വിജയന് വട്ടിപ്രം, കെ.രാധാകൃഷ്ണന്, ആനിയമ്മ രാജേന്ദ്രന്, കെ.ജയപ്രകാശ്, യു.ഇന്ദിര, എ.ഒ.രാമചന്ദ്രന് എന്നിവര് സംസാരിച്ചു. വി.പി.ദാസന് സ്വാഗതം പറഞ്ഞു. കണ്വെന്ഷനില് നൂറുകണക്കിന് എന്ഡിഎ പ്രവര്ത്തകര് സംബന്ധിച്ചു.
