കോട്ടയം: നാഗമ്പടത്ത് സ്ത്രീ ശക്തി തെളിയിച്ച് അമൃതശ്രീ സ്വയം സഹായ സംഘങ്ങളുടെ സംഗമം. ജില്ലയ്‌ക്ക് അകത്തും പുറത്ത് നിന്നുമായി പതിനയ്യായിരത്തില്‍പരം അമൃതശ്രീ സരംഭകരും പ്രവര്‍ത്തകരും സംഗമത്തില്‍ പങ്കാളിയായി. സിപിഐ സംസ്ഥാന സെക്രട്ടറി കാനം രാജേന്ദ്രന്‍ ഉദ്ഘാടനം ചെയ്തു.
സമൂഹത്തില്‍ ശാന്തിയും സമാധാനവുമുണ്ടാകാന്‍ സ്ത്രീസന്തോഷവതിയായിരിക്കണമെന്നും അതിനായി സാമ്പത്തിക സ്വതന്ത്ര്യത്തിനപ്പുറം സ്ത്രീ സംരക്ഷണവും ശാക്തീകരണവും ലക്ഷ്യമിട്ടാണ് മാതാഅമൃതാനന്ദമയി അമൃതശ്രീയ്‌ക്ക് രൂപം നല്‍കിയതെന്നും ചടങ്ങില്‍ അനുഗ്രഹ പ്രഭാഷണം നടത്തിയ സ്വാമി ജ്ഞാനാമൃതാനന്ദപുരി പറഞ്ഞു. തിരുവഞ്ചൂര്‍ രാധാകൃഷ്ണന്‍ എംഎല്‍എ, പി.സി. ജോര്‍ജ് എംഎല്‍എ എന്നിവര്‍ പ്രസംഗിച്ചു.
അമൃതശ്രീ സ്വയം സഹായസംഘങ്ങളിലെ അംഗങ്ങളുടെ മൂലധന വിതരണം ബിജെപി സംസ്ഥാന സമിതി അംഗവും കൊച്ചിന്‍ ഷിപ്പായര്‍ഡ് ഓഡിറ്റ് വിഭാഗം ഡയറക്ടറുമായ ബി.രാധാകൃഷ്ണ മേനോന്‍ നിര്‍വഹിച്ചു. തിരുവല്ല മഠധിപതി ഭവ്യാമൃതചൈതന്യ, നിഷ്‌കാമൃതചൈതന്യ, സൂര്യകാലടിമന സൂര്യന്‍ ജയസൂര്യന്‍ ഭട്ടതിരിപ്പാട്, അമൃതശ്രീ ചീഫ് കോഓര്‍ഡിനേറ്റര്‍ ആര്‍.രംഗനാഥന്‍, അമൃതശ്രീ ജില്ലാ ക്ലസ്റ്റര്‍ കോഓര്‍ഡിനേറ്റര്‍ സന്ധ്യ വിനോദ് തുടങ്ങിയവര്‍ പങ്കെടുത്തു.
ജന്മഭൂമി ഓണ്‍ലൈന്‍