ശ്രീനഗര്: അതിര്ത്തിയില് പാക്ക് പ്രകോപനം തുടരുന്നു. ജമ്മു കശ്മീരിലെ പൂഞ്ച് ജില്ലയില് നിയന്ത്രണ രേഖയ്ക്കു സമീപം രണ്ട് പാക്ക് യുദ്ധവിമാനങ്ങള് എത്തിയതായി റിപ്പോര്ട്ട്. നിയന്ത്രണ രേഖയ്ക്ക് പത്തുകിലോമീറ്റര് ദൂരത്തിലാണ് സൂപ്പര് സോണിക് വിമാനങ്ങള് കണ്ടതെന്ന് വാര്ത്താ ഏജന്സിയായ പിടിഐ റിപ്പോര്ട്ട് ചെയ്തു.
സംഭവത്തെ തുടര്ന്നു വ്യോമസേന അതീവ ജാഗ്രത നിര്ദേശം നല്കി. അതിര്ത്തിക്കു സമീപത്തുനിന്ന് സൂപ്പര് സോണിക് വിമാനങ്ങളുടെ ശബ്ദം കേട്ടതായും അധികൃതര് പറഞ്ഞു. ഫെബ്രുവരിയില് പാക്കിസ്ഥാന് ഇന്ത്യന് വ്യോമാതിര്ത്തി ലംഘിച്ച് ആക്രമണം നടത്തിയിരുന്നു.
അതിര്ത്തിലംഘിച്ച പാക്കിസ്ഥാന്റെ എഫ്-16 യുദ്ധവിമാനം ഫെബ്രുവരി 27ന് ഇന്ത്യ വെടിവച്ചിട്ടിരുന്നു. മാര്ച്ച് ആദ്യവാരം പാക്കിസ്ഥാന് ഡ്രോണുകള് അതിര്ത്തി ലംഘിച്ചിരുന്നു. അതിര്ത്തി ലംഘിച്ച രണ്ട് ഡ്രോണുകളും സൈന്യം വെടിവച്ചിട്ടിരുന്നു.
കഴിഞ്ഞ ദിവസങ്ങളിലും പൂഞ്ചില് അതിര്ത്തി ലംഘിച്ച് പാക്കിസ്ഥാന് ആക്രമണം നടത്തിയിരുന്നു. ഇതിനു പിന്നാലെയാണ് യുദ്ധവിമാനങ്ങള് അതിര്ത്തിക്കു സമീപത്തോടെ പറന്നത്.
