രാജ്കോട്ട്: കേരളാ സര്വകലാശാലയും കച്ച് സര്വകലാശാലയും സംയുക്തമായി നടത്തിയ ഖനനത്തില് 5000 വര്ഷം പഴക്കമുള്ള മനുഷ്യ അസ്ഥികൂടം കണ്ടെത്തി. ഗുജറാത്തിലെ കച്ച് ജില്ലയിലെ ധോലാവീരയില് രണ്ട് മാസം നീണ്ട ഖനനത്തിനൊടുവിലാണിത്. വിശദമായ പഠനത്തിന് അസ്ഥികൂടം കേരള സര്വകലാശാലയിലെത്തിച്ചു.
ഹാരപ്പന് സംസ്കാരകാലത്ത് ആളുകളെ അടക്കിയിരുന്ന പ്രദേശമെന്ന് കരുതുന്നിടത്ത് നിന്നാണ് അസ്ഥികൂടം കണ്ടെത്തിയത്. ഇതിന് ആറടിയോളം ഉയരമുണ്ട്. തല കിഴക്ക് ഭാഗത്തേക്ക് വച്ച് അടക്കം ചെയ്ത നിലയിലായിരുന്നു. ആകെയുള്ള 250 ഓളം ശവകുടീരങ്ങളില് 26 എണ്ണം പരിശോധിച്ചു. ആളുകള് ഇവിടെ കൂട്ടത്തോടെ താമസിച്ചിരുന്നിരിക്കാമെന്നതിലേക്കാണ് ശവക്കല്ലറകളുടെ എണ്ണം വിരല്ചൂണ്ടുന്നത്. ഏറ്റവും വലിയ കല്ലറയ്ക്ക് 6.9 മീറ്ററാണ് നീളം. ചെറുതിന് 1.2 മീറ്റര് നീളമുണ്ട്.
ഇതുവരെ ഗുജറാത്തില് നിന്ന് കണ്ടെത്തിയ ശവക്കല്ലറകളെല്ലാം വൃത്താകൃതിയിലോ അര്ധവൃത്താകൃതിയിലോ ഉള്ളവയാണ്. ഇതാദ്യമായാണ് ദീര്ഘചതുരാകൃതിയിലുള്ളവ കണ്ടെത്തുന്നത്. ശ്മശാനത്തിന് 4600 മുതല് 5200 വര്ഷം വരെ പഴക്കമുണ്ടെന്ന് കരുതുന്നു. പ്രായം, ലിംഗം, മരണകാരണം എന്നിവ പരിശോധിക്കുന്നതിനാണ് അസ്ഥികൂടം കേരള സര്വകലാശാലയിലെത്തിച്ചത്. ചിപ്പികൊണ്ടുള്ള വളകള്, അരകല്ലുകള്, കല്ലുകൊണ്ടുള്ള കൂര്ത്ത മൂര്ച്ചയേറിയ ആയുധങ്ങള് എന്നിവയും ഉല്ഖനനത്തില് കണ്ടെത്തി. അന്നത്തെ സംസ്കാരവും ആചാരങ്ങളുമെല്ലാം മനസിലാക്കുന്നതിന് ഇവ പരിശോധനയ്ക്ക് വിധേയമാക്കും. ഹാരപ്പന് സംസ്കാരകാലത്ത് ഇവിടത്തെ ജനങ്ങള് ജീവിച്ചിരുന്നതെങ്ങനെയെന്ന് ഇതിലൂടെ വ്യക്തമാകും.
