ന്യൂദല്‍ഹി: അയോധ്യക്കേസ് ഒത്തുതീര്‍പ്പിലൂടെ പരിഹരിക്കാന്‍ സുപ്രീംകോടതി മൂന്നംഗ മധ്യസ്ഥ സമിതിയെ നിയോഗിച്ചു. സുപ്രീംകോടതി മുന്‍ ജഡ്ജി ജസ്റ്റിസ് ഇബ്രാഹിം ഖലീഫുള്ള അധ്യക്ഷനായ സമിതിയില്‍ ജീവനകലാ ആചാര്യന്‍ ശ്രീ ശ്രീ രവിശങ്കര്‍, മുതിര്‍ന്ന അഭിഭാഷകന്‍ ശ്രീറാം പഞ്ചു എന്നിവരാണ് അംഗങ്ങള്‍. മുന്‍പ് നിരവധി തവണ നടന്ന ചര്‍ച്ചകള്‍ പരിഹാരം കാണാത്ത സാഹചര്യത്തില്‍ മധ്യസ്ഥശ്രമത്തെ ഹിന്ദു സംഘടനകള്‍ എതിര്‍ത്തിരുന്നു. രാമക്ഷേത്രം വൈകിപ്പിക്കാനുള്ള നീക്കമാണ് നടക്കുന്നതെന്നും എത്രയും പെട്ടെന്ന് വിധി പ്രഖ്യാപിക്കണമെന്നുമാണ് സംഘടനകളുടെ ആവശ്യം. ഇത് അവഗണിച്ചാണ് ചീഫ് ജസ്റ്റിസ് രഞ്ജന്‍ ഗൊഗോയിയുടെ നേതൃത്വത്തിലുള്ള അഞ്ചംഗ ഭരണഘടനാ ബെഞ്ചിന്റെ ഉത്തരവ്.
എട്ടാഴ്ചകള്‍ക്കുള്ളില്‍ ചര്‍ച്ച പൂര്‍ത്തിയാക്കണമെന്ന് കോടതി നിര്‍ദേശം നല്‍കി. നാലാഴ്ചയ്‌ക്കുള്ളില്‍ ആദ്യ റിപ്പോര്‍ട്ട് നല്‍കണം. ഉത്തര്‍പ്രദേശിലെ ഫൈസാബാദിലായിരിക്കും ചര്‍ച്ച. ഇതിനുള്ള സൗകര്യങ്ങള്‍ സംസ്ഥാന സര്‍ക്കാര്‍ ഒരുക്കണം. നിയമസഹായമുള്‍പ്പെടെ സമിതിക്ക് ആവശ്യപ്പെടാം. മധ്യസ്ഥ ചര്‍ച്ചാ സ്ഥലത്ത് മാധ്യമങ്ങള്‍ക്ക് പ്രവേശനമില്ല. ചര്‍ച്ചകളും സമിതിയുടെ പ്രവര്‍ത്തനങ്ങളും റിപ്പോര്‍ട്ട് ചെയ്യുന്നത് വിലക്കി. രഹസ്യസ്വഭാവം കോടതി ഉറപ്പുവരുത്തും. കൂടുതല്‍ ആളുകളെ ഉള്‍പ്പെടുത്തുന്നതില്‍ സമിതിക്ക് തീരുമാനമെടുക്കാം. ഭൂമി തര്‍ക്ക കേസ് കഴിഞ്ഞ മാസം 26ന് എട്ടാഴ്ചത്തേക്ക് കോടതി മാറ്റിയിരുന്നു. തര്‍ക്ക ഭൂമി മൂന്നായി വിഭജിക്കണമെന്ന അലഹബാദ് ഹൈക്കോടതി വിധിക്കെതിരായ അപ്പീലുകളാണ് സുപ്രീംകോടതി പരിഗണിക്കുന്നത്.
മുഹമ്മദ് ഇബ്രാഹിം ഖലീഫുള്ള
1975ല്‍ അഭിഭാഷകനായി തുടക്കം. 2000ല്‍ മദ്രാസ് ഹൈക്കോടതി ജഡ്ജിയായി. 2011ല്‍ ജമ്മു കശ്മീര്‍ ഹൈക്കോടതി ചീഫ് ജസ്റ്റിസായി നിയമിക്കപ്പെട്ടു. 2012ല്‍ സുപ്രീംകോടതി ജഡ്ജിയായി. 2016 ജൂലൈയില്‍ വിരമിച്ചു. സൗഹാര്‍ദത്തോടെ വിഷയം പരിഹരിക്കാന്‍ എല്ലാ ശ്രമങ്ങളും നടത്തുമെന്ന് അദ്ദേഹം പറഞ്ഞു.
ശ്രീ ശ്രീ രവി ശങ്കര്‍
ജീവനകലാ ആചാര്യനായ ശ്രി ശ്രീ രവിശങ്കര്‍ നേരത്തെ അയോധ്യ തര്‍ക്കം മധ്യസ്ഥശ്രമങ്ങളിലൂടെ പരിഹരിക്കാന്‍ ശ്രമിച്ചിരുന്നു. 2017ല്‍ അയോധ്യ സന്ദര്‍ശിച്ച് നിരവധി ചര്‍ച്ചകള്‍ നടത്തിയെങ്കിലും വിജയം കണ്ടില്ല. സമൂഹത്തില്‍ സമാധാനം നിലനില്‍ക്കുന്നതിനായി എല്ലാവരും ഒരുമിച്ച് പ്രവര്‍ത്തിക്കണമെന്നും പ്രശ്‌ന പരിഹാരത്തിനുള്ള ഒരു അവസരവും പാഴാക്കില്ലെന്നും അദ്ദേഹം പ്രതികരിച്ചു.
ശ്രീറാം പഞ്ചു
മദ്രാസ് ഹൈക്കോടതിയിലെ സീനിയര്‍ അഭിഭാഷകനായ ശ്രീറാം പഞ്ചു പ്രശസ്തനായ മധ്യസ്ഥ ചര്‍ച്ചയില്‍ വിദഗ്ധനാണ്. മീഡിയേഷന്‍ ചേംബറിന്റെ സ്ഥാപകനും അസോസിയേഷന്‍ ഓഫ് ഇന്ത്യന്‍ മീഡിയേറ്റേഴ്‌സിന്റെ പ്രസിഡന്റുമാണ്. ഇന്റര്‍നാഷണല്‍ മീഡിയേഷന്‍ ഇന്‍സ്റ്റിറ്റ്യൂട്ട് ഡയറക്ടറായും പ്രവര്‍ത്തിക്കുന്നു. അസമും നാഗാലാന്‍ഡും തമ്മിലുള്ള ഭൂമി തര്‍ക്കത്തില്‍ സുപ്രീംകോടതി മധ്യസ്ഥനായി നിയമിച്ചിരുന്നു. ഗൗരവമേറിയ ഉത്തരവാദിത്വമാണെന്നും പ്രശ്‌നപരിഹാരത്തിന് മികച്ച ഇടപെടല്‍ നടത്തുമെന്നും പഞ്ചു വ്യക്തമാക്കി.
