കാസര്കോട്: പെരിയ കലല്യോട്ട് കൃപേഷ്, ശരത് ലാല് എന്നിവരെ വെട്ടിക്കൊലപ്പെടുത്തിയ കേസില് മുഖ്യപ്രതിയായി പോലീസ് അറസ്റ്റു ചെയ്ത സിപിഎം ലോക്കല് കമ്മറ്റി അംഗം പീതാംബരന് കോടതിയില് കുറ്റം നിഷേധിച്ചു. പോലീസുകാര് മര്ദിച്ച് കുറ്റം സമ്മതിപ്പിക്കുകയായിരുന്നുവെന്നും അന്വേഷണ ഉദ്യോഗസ്ഥന് ഭീഷണിപ്പെടുത്തിയതായും പീതാംബരന് കോടതിയെ ബോധിപ്പിച്ചു.
ഹൊസ്ദുര്ഗ് ജുഡീഷ്യല് ഒന്നാം ക്ലാസ് മജിസ്ട്രേറ്റ് കോടതിയിലാണ് പീതാംബരന് കുറ്റം നിഷേധിച്ചത്. തല്ലിത്തീര്ക്കാനായിരുന്നു തന്റെ ഉദ്ദേശമെന്നും എന്നാല് കൂടെയുള്ളവരില് ചിലര് പെട്ടെന്ന് കൊല നടത്തുകയായിരുന്നുവെന്നും പീതാംബരന് നേരത്തെ പോലീസിന് മൊഴി നല്കിയിരുന്നതായാണ് വിവരം. കഞ്ചാവ് ലഹരിയിലാണ് അക്രമം നടത്തിയതെന്നും പീതാംബരന് മൊഴി നല്കിയിരുന്നു.
മദ്യപിക്കുകയോ പുകവലിക്കുകയോ ചെയ്യാത്ത പീതാംബരന് കഞ്ചാവുലഹരിയില് കൊല്ലുമെന്ന് കരുതുന്നില്ലെന്നായിരുന്നു വീട്ടുകാര് ഇതേ കുറിച്ച് പ്രതികരിച്ചത്. പീതാംബരനെയും സജി ജോര്ജിനെയും കോടതി റിമാന്ഡ് ചെയ്തു. കൊല്ലപ്പെട്ട ശരത്ലാലിനെയും കൃപേഷിനെയും ഇടിച്ചിട്ട വാഹനം ഓടിച്ചിരുന്നത് സിപിഎം ഏച്ചിലടുക്കം ബ്രാഞ്ച് കമ്മറ്റി അംഗം കൂടിയായ സജി ജോര്ജായിരുന്നു. ഇന്റര്ലോക്ക് സ്ഥാപന ഉടമയായ ഇയാള് വേറെയും കേസുകളില് പ്രതിയാണ്.
