കാസര്കോട്: റവന്യൂ മന്ത്രി ഇ.ചന്ദ്രശേഖരന്റെ അധ്യക്ഷതയില് നാളെ കാസര്കോട്ട് സര്വ്വകക്ഷി സമാധാന യോഗം. യോഗത്തില് സിപിഎമ്മും പങ്കെടുക്കും. രണ്ട് മണിക്ക് കളക്ടറേറ്റ് ഹാളിലാണ് യോഗം. യോഗത്തില് പങ്കെടുക്കുന്ന കാര്യത്തില് ഡിസിസി നേതൃത്വം നിലപാട് വ്യക്തമാക്കിയിട്ടില്ല.
കാസര്കോട്ട് യൂത്ത് കോണ്ഗ്രസ് പ്രവര്ത്തകര് കൊല്ലപ്പെട്ടതിനെത്തുടര്ന്ന് പെരിയ മേഖലയില് വലിയ അക്രമസംഭവങ്ങളാണുണ്ടായത്. പെരിയയിലും കല്യോട്ടും സിപിഎം അനുഭാവികളുടെ വീടിന് നേരെ ആക്രമണമുണ്ടായി. മുഖ്യപ്രതി പീതാംബരനുള്പ്പടെ പലരുടെയും വീടുകളും വ്യാപാരസ്ഥാപനങ്ങളും തീ വച്ച് നശിപ്പിക്കപ്പെട്ടു. പലയിടത്തും ഇപ്പോഴും സിപിഎം – കോണ്ഗ്രസ് സംഘര്ഷസാധ്യത നിലനില്ക്കുന്നുണ്ട്.
കൊല്ലപ്പെട്ട പ്രവര്ത്തകരുടെ വീട് സന്ദര്ശിക്കാന് മുഖ്യമന്ത്രി താത്പര്യമറിയിച്ചിരുന്നെങ്കിലും ക്രമസമാധാനപ്രശ്നങ്ങള് കണക്കിലെടുത്ത് സന്ദര്ശനം റദ്ദാക്കിയിരുന്നു. റവന്യൂമന്ത്രിയും കാസര്കോട് സ്വദേശിയുമായ ഇ.ചന്ദ്രശേഖരന് കുടുംബങ്ങളെ കാണാനെത്തിയപ്പോള് കോണ്ഗ്രസ് പ്രവര്ത്തകര് മോശം പരാമര്ശങ്ങള് നടത്തി തിരിച്ചയച്ചെന്ന് ആരോപണമുയര്ന്നു. സിപിഎം നേതാക്കള് മേഖല സന്ദര്ശിക്കാനെത്തിയപ്പോള് സ്ത്രീകളുള്പ്പടെയുള്ളവരെത്തി വലിയ രീതിയില് രോഷപ്രകടനം നടത്തുകയും ചെയ്തിരുന്നു.
എന്നാല് വിപിപി മുസ്തഫയുള്പ്പടെയുള്ള സിപിഎം നേതാക്കളുടെ കൊലവിളി പ്രസംഗങ്ങളും വാക്പോരും വലിയ രീതിയില് പ്രകോപനവുമുണ്ടാക്കി. കോണ്ഗ്രസ് ഇപ്പോഴും അമര്ഷത്തിലാണ്. കേസിലെ പ്രധാനപ്രതികളെ പിടിച്ചില്ല, ഗൂഢാലോചനയിലേക്ക് അന്വേഷണം നീളുന്നില്ല, സിബിഐ അന്വേഷണമില്ലാതെ സത്യം പുറത്തു വരില്ല എന്നീ ആരോപണങ്ങളാണ് കോണ്ഗ്രസ് ഉയര്ത്തുന്നത്.
