കോട്ടയം: കൊച്ചി വൈപ്പിന് കേന്ദ്രീകരിച്ച് പ്രവര്ത്തിക്കുന്ന ‘ലോകധര്മ്മി’ നാടക വേദിക്ക് സംസ്ഥാന ബജറ്റില് ഈ വര്ഷവും തുക അനുവദിച്ചത് വിവാദത്തില്. 25 ലക്ഷം രൂപയാണ് സംസ്ഥാന ബജറ്റില് വകയിരുത്തിയത്. കഴിഞ്ഞ ബജറ്റിലും ഈ സംഘടനയ്ക്ക് 25 ലക്ഷം രൂപ വകയിരുത്തിയിരുന്നു. നാടക പ്രവര്ത്തകരുടെ സംഘടനകളാണ് ഇതിനെതിരെ പ്രതിഷേധവുമായി രംഗത്ത് വന്നത്.
സംസ്ഥാനത്ത് നിരവധി നാടക സംഘങ്ങളും, പരിശീലന പരിപാടികളും നടക്കുന്നുണ്ട്. അവര്ക്കാര്ക്കും സഹായം അനുവദിക്കാതെ ഒരു നാടക സംഘത്തിന് മാത്രം തുടര്ച്ചയായി ബജറ്റില് പണം അനുവദിച്ചതിനെയാണ് ഇവര് ചോദ്യം ചെയ്യുന്നത്.
കോളേജ് അധ്യാപകനും നാടക പ്രവര്ത്തകനുമായ ചന്ദ്രദാസനാണ് 1997ല് ലോകധര്മിക്ക് രൂപം നല്കിയത്. പരമ്പരാഗത നടകശൈലികളും വിവിധ സംസ്ഥാനങ്ങളിലെയും വിദേശങ്ങളിലെയും നാടകങ്ങളും പരിചയപ്പെടുത്തുകയും പരിശീലിപ്പിക്കുകയും ചെയ്യുന്നുവെന്ന പേരിലാണ് ഈ സമിതിക്ക് പണം അനുവദിച്ചിരിക്കുന്നത്.
കൊടുംപട്ടിണിയിലും നാടകമെന്ന കലയെ കൈവിടാതെ നെഞ്ചോട് ചേര്ത്തുപിടിക്കുന്ന വലിയൊരു വിഭാഗം നാടകപ്രവര്ത്തകര് ഇവിടെയുണ്ട്. നാടകത്തിന് വേണ്ടി ഒട്ടേറെ നഷ്ടം സഹിച്ചവരും ഇവിടെയുണ്ട്. അവരെയൊന്നും സഹായിക്കാതെയാണ് ലോകധര്മിക്ക് ബജറ്റില് പണം അനുവദിച്ചതെന്നാണ് നാടക പ്രവര്ത്തകരുടെ ആരോപണം.
ലോകധര്മിയുടെ ഉപദേശക സമിതിയിലും സംഘാടക സമിതിയിലും സിപിഎം സഹയാത്രികരും അര്ബന് നക്സലുകളുമാണെന്നാണ് മറ്റൊരാരോപണം. ഉപദേശക സമിതിയിലേയും സംഘാടക സമിതിയിലേയും പലരുടെയും സോഷ്യല് മീഡിയ ഇടപെടലുകള് അത്തരമൊരു ആരോപണത്തിന് ശക്തിപകരുന്നതാണ്. സംഘാടക സമിതി ഇക്കാര്യം നിഷേധിക്കുന്നുമില്ല. സര്ക്കാരിന്റെ വിവേചനത്തിനെതിരെ നാടക പ്രവര്ത്തകരുടെ പ്രതിഷേധം ശക്തമാകുകയാണ്.
സര്ക്കാരിന്റെ സഹായം ഉദ്ദേശിച്ചല്ല ലോകധര്മ്മി എന്ന നാടകവേദിക്ക് തുടക്കമിട്ടതെന്ന് ചന്ദ്രദാസന് പറയുന്നു. ലോകത്തിന്റെ വിവിധ സ്ഥലങ്ങളില് നിന്ന് നാടകത്തെക്കുറിച്ച് പഠിക്കാനും ഗവേഷണം നടത്താനും എത്തുന്ന കലാകാരന്മാര്ക്കും വിദ്യാര്ത്ഥികള്ക്കും ആവശ്യമായ സഹായങ്ങള് നല്കുകയാണ് ലക്ഷ്യമെന്നും സര്ക്കാര് ധനസഹായം ചെലവഴിക്കുന്നത് സംബന്ധിച്ച് കൃത്യമായ കണക്കും അതില് ഓഡിറ്റിങും നടക്കുന്നുണ്ടെന്നും ചന്ദ്രദാസന് പറഞ്ഞു.
