പെരിന്തല്മണ്ണ: ശബരിമലയില് ആചാരലംഘനം നടത്തിയ ഇടത് സഹയാത്രിക കനകദുര്ഗയെ ഭര്ത്താവും കൈവിട്ടു. ആശുപത്രിയില് നിന്ന് വീട്ടിലേക്ക് കൊണ്ടുപോകാനാകില്ലെന്ന് ഭര്ത്താവ് കൃഷ്ണനുണ്ണി നിലപാടെടുത്തതോടെ ഇവരെ പോലീസ് സര്ക്കാരിന്റെ അഭയകേന്ദ്രത്തിലേക്ക് മാറ്റി. ഭര്തൃമാതാവ് മര്ദ്ദിച്ചുവെന്ന് ആരോപിച്ച് കോഴിക്കോട് മെഡിക്കല് കോളേജില് ചികിത്സയിലായിരുന്നു കനകദുര്ഗ.
ഡിസ്ചാര്ജ് ചെയ്തപ്പോള് ഇവരെ വീട്ടിലേക്ക് കൊണ്ടുപോകാന് കൃഷ്ണനുണ്ണിയോട് ആവശ്യപ്പെട്ടു. എന്നാല്, പോലീസിന്റെ ആവശ്യം കൃഷ്ണനുണ്ണി നിരസിച്ചു. തിങ്കളാഴ്ച രാത്രി പോലീസ് കനകദുര്ഗയുമായി അങ്ങാടിപ്പുറത്തെ വീട്ടിലെത്തിയെങ്കിലും ഇവരെ വീട്ടില് കയറ്റാന് കൃഷ്ണനുണ്ണി തയാറായില്ല. തുടര്ന്ന് പോലീസ് ഇടപെട്ട് പെരിന്തല്മണ്ണയിലെ വണ് സ്റ്റോപ്പ് സെന്ററില് താമസസൗകര്യമൊരുക്കി. സമൂഹത്തില് അക്രമത്തിനിരയാകുന്ന പെണ്കുട്ടികളെ താത്കാലികമായി പാര്പ്പിക്കുന്ന ഇടമാണിത്.
ഹിന്ദുസമൂഹത്തെ മുഴുവന് അവഹേളിച്ച കനകദുര്ഗയ്ക്കെതിരെ ആദ്യം പ്രതിഷേധവുമായി രംഗത്തെത്തിയത് സ്വന്തം വീട്ടുകാര് തന്നെയായിരുന്നു. അമ്മയും സഹോദരനുമടക്കം ഇവരെ വീട്ടില് കയറ്റില്ലെന്ന് പലതവണ വ്യക്തമാക്കി. കഴിഞ്ഞ ദിവസം ശബരിമല കര്മസമിതി തിരുവന്തപുരത്ത് സംഘടിപ്പിച്ച അയ്യപ്പഭക്തസംഗമത്തില് ലക്ഷങ്ങളെ സാക്ഷിയാക്കി കനകദുര്ഗയുടെ സഹോദരന് ഭരത് ഭൂഷണ് വിശ്വാസികളോട് മാപ്പുചോദിച്ചിരുന്നു.
സിപിഎം നേതാക്കളുടെ കാവലിലാണ് കനകദുര്ഗ ആശുപത്രിയിലും, ഇപ്പോള് വണ് സ്റ്റോപ്പ് സെന്ററിലും കഴിയുന്നത്.
