കോഴിക്കോട്: ശ്രീനാരായണ ഗുരുവിന്റെ വാക്കുകളെ കെഇഎന്‍ കുഞ്ഞഹമ്മദ് ദുര്‍വ്യാഖ്യാനം ചെയ്‌തെന്ന് ചരിത്രകാരന്‍ ഡോ. എം.ജി.എസ്. നാരായണന്‍. ഇസ്ലാമിലേക്ക് മതം മാറുകയാണ് നവോത്ഥാന ബദലെന്നു പറഞ്ഞ് ടൈംസ് ഓഫ് ഇന്ത്യയില്‍ കെഇഎന്‍ എഴുതിയ ലേഖനത്തെക്കുറിച്ച് പ്രതികരിക്കുകയായിരുന്നു എംജിഎസ്.
ലേഖനത്തില്‍ ശ്രീനാരായണ ഗുരുവിനെ നന്നാക്കി പറയുന്നുണ്ട്. എന്നാലത് തന്റെ അഭിപ്രായത്തെ ന്യായീകരിക്കുന്നതിന് വേണ്ടിയാണ്. ഇതിനെക്കുറിച്ച് അറിയാത്ത ആളുകള്‍ തെറ്റിദ്ധരിക്കും, എംജ.എസ് പറഞ്ഞു. നവോത്ഥാനവും മതംമാറ്റവുമായി യാതൊരു ബന്ധവുമില്ല. നവോത്ഥാനത്തിന് മതംമാറ്റം ചെയ്യേണ്ടതില്ല. ലേഖകന്‍ ഇടതുപക്ഷ പുരോഗമന എഴുത്തുകാരനാണെന്നാണ് പറയുന്നത്.
എന്നാല്‍ എഴുതിയിരിക്കുന്നത് ഇസ്ലാമിനെയും ഇസ്ലാമിലേക്കുള്ള മതംമാറ്റത്തെയും പിന്തുണച്ചുകൊണ്ടാണ്. ലേഖകന്‍ മതേതരവാദിയാണെന്ന് തോന്നുന്നില്ല. ഏതെങ്കിലും മതത്തില്‍ വിശ്വസിക്കുന്ന ആള്‍ക്ക് എങ്ങനെ മതേതരവാദിയാകാനാകും. മതത്തില്‍ വിശ്വസിക്കാത്തവര്‍ക്കേ മതേതരവാദിയാകാനാകൂ. ഒരു മതത്തെ പിന്തുണച്ച് എഴുതുന്നയാള്‍ക്ക് എങ്ങനെ മതേതരവാദിയാകാനാകും. മതേതരവാദി എന്നത് നാട്യം മാത്രമാണ്.
ടിപ്പു സുല്‍ത്താനെയും അദ്ദേഹത്തിന്റെ പ്രവര്‍ത്തികളെയും ന്യായീകരിക്കുന്ന ചിലരുണ്ട്. പരിഷ്‌കാരത്തിന് വേണ്ടിയാണ് മതപരിവര്‍ത്തനത്തിന് വേണ്ടിയല്ല, ടിപ്പു അങ്ങനെയെല്ലാം ചെയ്തതെന്നാണ് അവരുടെ അഭിപ്രായം. ഇത്തരമൊരു നിലപാടാണ് ലേഖനത്തിലുമുള്ളത്. എല്ലാ മതങ്ങളിലും പോസിറ്റീവും നെഗറ്റീവും ആയ കാര്യങ്ങളുണ്ട്. ഇസ്ലാമിലും അതുണ്ട്. നവോത്ഥാനത്തിന്റെ യഥാര്‍ത്ഥ പ്രതിഫലനമല്ല ലേഖനത്തിലുള്ളതെന്നും ഡോ. എം.ജി.എസ്. നാരായണന്‍ കൂട്ടിച്ചേര്‍ത്തു.
‘ഒരു മതത്തിനുള്ളില്‍ ശ്വാസംമുട്ടുന്ന വ്യക്തി ഉടനെ തന്നെ ആ മതംവിട്ടു പുറത്തുവരണമെന്നും അല്ലാത്തപക്ഷം അത് ആ വ്യക്തിക്കും മതത്തിനും ബുദ്ധിമുട്ട് സൃഷ്ടിക്കും എന്നുമാണ് ഗുരുദേവന്‍ പറഞ്ഞത്. മഹാത്മാഗാന്ധിയുമായുള്ള സംവാദത്തിനിടെ മറ്റു മതങ്ങളിലും മോക്ഷമാര്‍ഗം ലഭ്യമാണ് എന്ന് ഗുരുദേവന്‍ പറഞ്ഞിരുന്നു’ എന്നാണ് കെഇഎന്‍ ലേഖനത്തില്‍ പറയുന്നത്.
എന്നാല്‍ എല്ലാ മതത്തിന്റെയും ലക്ഷ്യം മോക്ഷമാണെന്നും അതിനാല്‍ തന്നെ ഒരു മതവും മറ്റൊരു മതത്തേക്കാള്‍ കേമമല്ലെന്നും ഗുരുദേവന്‍ പറഞ്ഞത് മതപരിവര്‍ത്തനത്തെ ശക്തമായി എതിര്‍ക്കുന്നതിനായിരുന്നു. ഇതു മറച്ചുവച്ചാണ് കെഇഎന്‍ തന്റെ വാദത്തിന് ബലം ലഭിക്കാന്‍ ഗുരുവിനെ പോലും ദുരുപയോഗം ചെയ്യുന്നത്.
