സന്നിധാനം: ശബരിമലയില് ആക്ടിവിസ്റ്റുകളെ പ്രവേശിപ്പിക്കാന് ഇടതു സര്ക്കാര് നടത്തിയത് ഏഴു ദിവസത്തെ ആസൂത്രണം. ഇതിന് പോലീസില് പ്രത്യേക ടീമും രൂപീകരിച്ചു. പദ്ധതി ആസൂത്രണം ചെയ്തത് ഡിജിപി ലോക്നാഥ് ബഹ്റ, എഡിജിപി മനോജ് എബ്രഹാം, ഐജി വിജയ് സാഖറെ എന്നിവര്. നടപ്പിലാക്കാന് നേതൃത്വം നല്കിയത് എസ്പി ഹരിശങ്കര്.
ഡിസംബര് 28 ന് മലകയറാനെത്തിയ ബിന്ദുവിനെയും കനക ദുര്ഗയെയും ഭക്തര് തടഞ്ഞതിനെത്തുടര്ന്ന് പിന്വാങ്ങിയത് മുതല് ഇവര് പോലീസിന്റെ രഹസ്യ സങ്കേതത്തിലാണ്. ഏഴ് ദിവസം പോലീസ് സംരക്ഷണയില്. ഇവര്ക്ക് കൃത്യമായ പദ്ധതിയും പഠിപ്പിച്ചു നല്കി. നാലു ദിവസമായി പ്രത്യേക സംഘത്തിലെ ഉദ്യോഗസ്ഥര് സന്നിധാനത്തും പരിസര പ്രദേശത്തും പദ്ധതി ആസൂത്രണം ചെയ്യുന്ന തിരക്കിലായിരുന്നു. ശബരിമല പാതയില് ഏറ്റവും തിരക്ക് കുറഞ്ഞ സമയമായ പുലര്ച്ചെ നെയ്യഭിഷേകം തുടങ്ങുന്ന സമയം തെരഞ്ഞെടുത്തു.
നിലയ്ക്കല്, വടശ്ശേരിക്കര, എരുമേലി എന്നിവിടങ്ങളിലെ സുരക്ഷാ മേല്നോട്ട ചുമതല ഇന്റലിജന്സ് ഡിഐജി എസ്. സുരേന്ദ്രന്, കോഴിക്കോട് റൂറല് ജില്ലാ പോലീസ് മേധാവി ജി. ജയദേവ്, ക്രൈംബ്രാഞ്ച് എസ്പി പി.ബി. രാജീവ്, പമ്പയിലുണ്ടായിരുന്ന കെഎപി അഞ്ചാം ബറ്റാലിയന് കമാന്ഡന്റ് കാര്ത്തികേയന് ഗോകുലചന്ദ്രന്, ക്രൈംബ്രാഞ്ച് എസ്പി ഷാജി സുഗുണന് എന്നിവരുമായി പ്രത്യേക സംഘം ചര്ച്ച നടത്തി. സര്ക്കാര് നിലപാട് അനുകൂലമായതോടെ ഇന്നലെ പദ്ധതി നടത്താന് തീരുമാനിച്ചു. അതിന്റെ ഭാഗമായി ഉച്ച മുതല് സോപാനത്ത് നിന്ന് ഭസ്മക്കുളത്തിലേക്ക് ഇറങ്ങുന്ന ഭാഗം പോലീസ് അടച്ചു. ദേവസ്വം ജീവനക്കാരെപ്പോലും കര്ശന പരിശോധനയോടെയാണ് കടത്തിവിട്ടത്. പോലീസുകാര്ക്കും വിലക്കുണ്ടായി.
രാത്രി 1.10ഓടെ യുവതികളെ പമ്പയില് എത്തിച്ചു. ഒരാളെ പന്നി ഇടിച്ചുവെന്ന് പറഞ്ഞ് ഫോറസ്റ്റ് വിഭാഗത്തിന്റെ ആംബുലന്സ് വെഹിക്കിള് വിളിച്ചുവരുത്തി. സുരക്ഷാ പരിശോധന ഇല്ലാതെ ട്രാക്ടര് റോഡിലൂടെ സ്വാമി അയ്യപ്പന് റോഡില് കടന്നു. നെയ്യഭിഷേകം തുടങ്ങുന്ന സമയമായതിനാല് തിരിച്ചിറങ്ങുന്ന ഭക്തരും കുറവായിരുന്നു.
നെയ്യഭിഷേകത്തിന് മാത്രം തിരക്കും ഗണപതിഹോമം നടക്കുന്ന സമയവും നോക്കി യുവതികളെ വടക്കേ നടയില് എത്തിച്ചു. യുവതികള്ക്ക് മുന്നേ പോലീസ് മഫ്തിയിലുള്ളതിനാല് ആരും തടഞ്ഞില്ല. യുവതികള്ക്കൊപ്പമുള്ള പോലീസുകാര് തന്നെ ദൃശ്യങ്ങളെല്ലാം പകര്ത്തി. രഹസ്യകേന്ദ്രത്തിലേക്ക് മടക്കി അയച്ച ശേഷമാണ് ദൃശ്യങ്ങള് പുറത്തുവിട്ടത്.
യുവതികളുടെ സുരക്ഷാ ചുമതലയിലുണ്ടായിരുന്ന ഇരുപതില് താഴെ ഉദ്യോഗസ്ഥരൊഴികെ, താഴേത്തട്ടിലുള്ള ഉദ്യോഗസ്ഥരാരും യുവതികളെത്തുന്ന വിവരം അറിഞ്ഞില്ല. വനിത പോലീസിനെയും അറിയിച്ചില്ല. മൂന്നു ദിവസമായി ശബരിമലയില് മഫ്തി പോലീസുകാരുടെ എണ്ണം കൂട്ടി.
