മലപ്പുറം: ശബരിമലയിലെ യുവതീപ്രവേശനത്തിന് പിന്നില് സിപിഎമ്മിന്റെ ഗൂഢാലോചനയാണെന്ന് കഴിഞ്ഞ ദിവസം ദര്ശനം നടത്തിയ യുവതികളിലൊരാളായ കനകദുര്ഗ്ഗയുടെ സഹോദരന് ഭരത്ഭൂഷണ് ജന്മഭൂമിയോട് പറഞ്ഞു. കോട്ടയം എസ്പി ഹരിശങ്കറാണ് പദ്ധതി നടപ്പാക്കിയത്.
കനകദുര്ഗ്ഗയേയും ഒപ്പമുണ്ടായിരുന്ന കോഴിക്കോട് സ്വദേശിനി ബിന്ദുവിനെയും കണ്ണൂരിലെ ഒളിസങ്കേതത്തില് പാര്പ്പിച്ചിരിക്കുകയായിരുന്നു. കഴിഞ്ഞ 23ന് തിരുവനന്തപുരത്ത് യോഗത്തിന് പോകുകയാണെന്ന് പറഞ്ഞാണ് വീട്ടില് നിന്നിറങ്ങിയത്. 24ന് മലകയറി. പ്രതിഷേധത്തെത്തുടര്ന്ന് പിന്മാറിയ ഇവരെ കുറിച്ച് തങ്ങള്ക്ക് ഒരു വിവരവും ഉണ്ടായിരുന്നില്ലെന്നും ഭരത്ഭൂഷണ് പറഞ്ഞു.
സിപിഎം പ്രാദേശിക നേതാക്കളുടെ സഹായത്തോടെ 25ന് എസ്പി ഹരിശങ്കറുമായി ബന്ധപ്പെട്ടിരുന്നു.
പോലീസ് സംരക്ഷണയില് തൃശൂരില് കനകദുര്ഗ്ഗയെ എത്തിച്ചു തരാമെന്ന് എസ്പി പറഞ്ഞിരുന്നു. എന്നാല്, പിന്നീട് തന്റെ ഫോണ്കോളുകള് എസ്പി എടുക്കാന് തയാറായില്ല. പിന്നീട് രണ്ട് ദിവസങ്ങള്ക്ക് ശേഷം അവരെ കണ്ണൂരിലേക്ക് മാറ്റിയെന്നും സുഹൃത്തിന്റെ വീട്ടില് സുരക്ഷിതയാണെന്നും എസ്പി അറിയിച്ചു. എത്രയും പെട്ടെന്ന് അവരെ തിരിച്ചെത്തിക്കണമെന്ന് ആവശ്യപ്പെട്ടപ്പോള് ഹരിശങ്കര് ഒഴിഞ്ഞുമാറിയെന്നും ഇദ്ദേഹം പറഞ്ഞു.
ഇതിനിടെ, കനകദുര്ഗ്ഗയെ കാണാനില്ലെന്ന് കാണിച്ച് ഭര്ത്താവ് പെരിന്തല്മണ്ണ പോലീസില് പരാതി നല്കിയിരുന്നു.
കണ്ണൂരിലേതടക്കം പല സിപിഎം നേതാക്കളുമായി ബന്ധപ്പെട്ടിരുന്നുവെന്നും ഭരത്ഭൂഷണ് പറഞ്ഞു. അതിന്റെയെല്ലാം ശബ്ദരേഖ തന്റെ പക്കലുണ്ട്, ആവശ്യമെങ്കില് ഇവ കോടതിയില് ഹാജരാക്കും. ഭര്ത്താവടക്കം എല്ലാവരും മാനസികമായി തളര്ന്നിരിക്കുകയാണ്. ഈശ്വരവിശ്വാസികളായ കുടുംബത്തെ കൂടുതല് അപമാനിക്കാതെ തിരികെ വരാന് കനകദുര്ഗ്ഗ തയാറാകണം, ശബരിമലയിലെ ആചാരങ്ങള് സംരക്ഷിക്കപ്പെടണമെന്നാണ് തങ്ങളുടെ ആഗ്രഹമെന്നും ഭരത്ഭൂഷണ് പറഞ്ഞു.
