കാസര്കോട്: സംസ്ഥാന സര്ക്കാരിന്റെ സഹായത്തോടു കൂടി ഇരുട്ടിന്റെ മറവില് യുവതികള് ശബരിമലയില് ആചാരലംഘനം നടത്തിയതില് പ്രതിഷേധിച്ച് ശബരിമല കര്മ്മസമിതിയുടെ നേതൃത്വത്തില് കാസര്കോട്-മംഗലാപുരം ദേശീയപാതയില് റോഡ് ഉപരോധിച്ചു. 100 കണക്കിന് അയ്യപ്പഭക്തരാണ് റോഡ് ഉപരോധത്തിലും പ്രകടനത്തിലും പങ്കെടുത്തത്.
സമാധാനപരമായി അയ്യപ്പ നാമജപങ്ങളോടെ റോഡ് ഉപരോധത്തില് ഏര്പ്പെട്ടവരുടെ ചിത്രങ്ങളും വീഡിയോകളും സംഭവ സ്ഥലത്തുണ്ടായിരുന്ന പോലീസുകാര് സ്വകാര്യ മൊബൈല് ഫോണുകളില് ചിത്രീകരിച്ചത് അല്പ്പ നേരം വാക്കേറ്റത്തിനിടയാക്കി. നാമജപത്തില് പങ്കെടുത്തവര് തങ്ങളുടെ ചിത്രങ്ങള് പകര്ത്തുന്നതിനെതിരല്ലെന്നും പക്ഷെ അത് പോലീസിന്റെ ഔദ്യോഗിക ക്യാമറയിലായിരിക്കണമെന്നും ഉന്നത പോലീസ് ഉദ്യോഗസ്ഥരോട് ഉപരോധത്തിലേര്പ്പെട്ടവര് ആവശ്യപ്പെട്ടു.
അപ്രതീക്ഷിതചമായി പ്രഖ്യാപിച്ച സമരായിട്ടുപോലും ശബരിമല ആചാരാനുഷ്ഠാനങ്ങള് സംരക്ഷിക്കണമെന്ന് ആവശ്യപ്പെട്ടുകൊണ്ട് 100 കണക്കിന് പേര് തടിച്ചുകൂടിയത് ജില്ലാ ഭരണകൂടത്തെ ആകെ ഞെട്ടിച്ചിരിക്കുകയാണ്.
ആര്എസ്എസ് കാസര്കോട് താലൂക്ക സംഘചാലക് ദിനേശ് മടച്ചിറ, ബിജെപി സംസ്ഥാന സമിതി അംഗം രവീശ തന്ത്രി കുണ്ടാര്, ശബരിമല കര്മ്മസമിതി ജില്ലാ വൈസ് പ്രസിഡന്റ് എന് മുരളീധരന്, രക്ഷാധികാരി മോനപ്പ ഗുരുസ്വാമി, യുവമോര്ച്ച സംസ്ഥാന വൈസ് പ്രസിഡന്റ് ബിജു എളക്കുഴി, ബിജെപി ജില്ലാ ജനറല് സെക്രട്ടറി പി രമേശ്, മണ്ഡലം പ്രസിഡന്റ് സുധാമ ഗോസാഠ, കൗണ്സിലര്മാരായ കെ.ജി. മനോഹരന്, ശങ്കര, ശ്രീലത ടീച്ചര് തുടങ്ങിയര് പ്രകടനത്തിന് നേതൃത്വം നല്കി. ആചാരലംഘനത്തിനെതിരെ വിവിധ ജില്ലകളില് ഇത്തരത്തില് വന് പ്രതിഷേധമാണ് ഭക്തരുടെ ഭാഗത്ത് നിന്നുണ്ടാകുന്നത്.
