മെല്ബണ്: ഇന്ത്യ- ഓസ്ട്രേലിയ മൂന്നാം ടെസ്റ്റിനിടെ ഋഷഭ് പന്തിനെ പ്രകോപിപ്പിക്കാന് ശ്രമിച്ച് ഓസ്ട്രേലിയന് നായകന് ടിം പെയ്ന്. തന്റെ കുട്ടികളെ നോക്കാന് വരുമോ എന്നു ചോദിച്ചായിരുന്നു പെയിനിന്റെ പ്രകോപനം. വിക്കറ്റ് കീപ്പര് കൂടിയായ പെയ്ന്, പന്തിനെ അസ്വസ്ഥനാക്കുവാന് പറഞ്ഞ കാര്യങ്ങള് സ്റ്റംപ് മൈക്രോഫോണില് പതിയുകയായിരുന്നു. മൂന്നാം ദിനത്തില് ഇന്ത്യ അഞ്ച് വിക്കറ്റ് നഷ്ടമെന്ന നിര്ണായക ഘട്ടത്തിലെത്തി നില്ക്കെ ക്രീസിലെത്തിയ പന്തിനെ മുന് ഇന്ത്യന് നായകന് എം.എസ്. ധോണിയുടെ പേരു പറഞ്ഞ് ചൂടുപിടിപ്പിക്കാനായിരുന്നു പെയ്നിന്റെ ശ്രമം.
എംഎസ് ഏകദിന ക്രിക്കറ്റില് തിരിച്ചെത്തിയെന്നും നിനക്കിനി കൂടുതല് നാള് ഓസ്ട്രേലിയയില് വിശ്രമം ആകാമെന്നും പെയ്ന് പറഞ്ഞു. യുവതാരത്തിന് വാട്ടര്ഫ്രണ്ട് അപ്പാര്ട്ട്മെന്റ് വാങ്ങി നല്കാമെന്നും അവിടെ തന്റെ കുട്ടികളെ കളിപ്പിച്ചിരുന്നാല് തനിക്കും ഭാര്യക്കും സിനിമയ്ക്ക് പോകാമായിരുന്നുവെന്നുമുള്ള കമന്റുകളും ഓസ്ട്രേലിയന് നായകന് നടത്തി.
മുന്പും ഇത്തരം പ്രവൃത്തികളിലൂടെ വാര്ത്തയില് ഇടംപിടിച്ചയാളാണ് പെയ്ന്. അതേസമയം, സ്റ്റംപ് മൈക്രോഫോണുകളുടെ ഉപയോഗത്തിനെതിരെ ഓസ്ട്രേലിയന് പ്ലെയേഴ്സ് ബോഡി രംഗത്തെത്തിയിട്ടുണ്ട്.
