തിരുവനന്തപുരം: ശബരിമലയില് ഏതുവിധേനയും സ്ത്രീകളെ എത്തിക്കാനുള്ള സര്ക്കാരിന്റെ ശ്രമങ്ങളാണ് ഇപ്പോള് അരങ്ങേറുന്നതെന്ന് വി.മുരളീധരന് എം.പി. കേരളത്തില് നിന്ന് ശബരിമല സന്ദര്ശനത്തിന് സ്ത്രീകളെ കിട്ടിയില്ലെങ്കില് സംസ്ഥാനത്തിന് പുറത്തുനിന്ന് എത്തിക്കുക എന്ന സര്ക്കാര് അജണ്ടയാണ് ഇപ്പോള് നടപ്പിലാക്കുന്നതെന്നും അദ്ദേഹം പറഞ്ഞു.
ഭക്തരോടും സ്ത്രീകളോടുമുള്ള വഞ്ചനയുടേയും ഇരട്ടത്താപ്പിന്റേയും സമീപനം സര്ക്കാര് അവസാനിപ്പിക്കണമെന്നും അദ്ദേഹം ആവശ്യപ്പെട്ടു. സ്ത്രീകളെ ശബരിമലയിലേക്ക് ക്ഷണിച്ചുവരുത്തിയ ശേഷം അവര്ക്ക് തിരിച്ചുപോകേണ്ടി വരുന്ന സാഹചര്യം സൃഷ്ടിക്കുന്ന സര്ക്കാരിന് ഭക്തരോടോ സ്ത്രീകളോടോ പ്രതിബദ്ധതയില്ലെന്നും മുരളീധരന് പറഞ്ഞു.
ഭരണഘടനാ ബാധ്യത നിറവേറ്റാന് സര്ക്കാരിനു മേലുള്ള സമ്മര്ദ്ദം മനസിലാക്കുന്നു. പക്ഷേ അതിന്റെ പേരില് ശബരിമലയിലെ ആചാരങ്ങളേയും അനുഷ്ഠാനങ്ങളേയും തകര്ക്കാനുള്ള ശ്രമങ്ങളാണ് നടക്കുന്നത്. മുഖ്യമന്ത്രിസ്ഥാനത്തെ അപഹാസ്യമാക്കുന്ന തരത്തിലുള്ള പ്രവൃത്തികളാണ് മുഖ്യമന്ത്രിയുടെ ഭാഗത്തുനിന്ന് ഇപ്പോള് ഉണ്ടാവുന്നതെന്നും മുരളീധരന് ആരോപിച്ചു.
ശബരിമല സന്ദര്ശനത്തിനെത്തിയ മനിതി അംഗങ്ങളുടെ രാഷ്ട്രീയചായ്വ് വളരെ വ്യക്തമാണ്. മുഖ്യമന്ത്രിയെ കണ്ട ശേഷമാണ് മനിതി അംഗങ്ങള് എത്തിയതെന്നും അദ്ദേഹം പറഞ്ഞു. മുഖ്യമന്ത്രിസ്ഥാനത്തെ അപഹാസ്യമാക്കുന്ന തരത്തിലുള്ള പ്രവൃത്തികളാണ് മുഖ്യമന്ത്രിയുടെ ഭാഗത്തുനിന്ന് ഇപ്പോള് ഉണ്ടാവുന്നതെന്നും മുരളീധരന് കുറ്റപ്പെടുത്തി.
