ന്യൂദല്ഹി: തൃശൂര് സിറ്റി പോലീസ് കമ്മീഷണര് യതീഷ് ചന്ദ്രയ്ക്കെതിരെ കേന്ദ്ര ധനകാര്യ സഹമന്ത്രി പൊന് രാധാകൃഷ്ണന് അവകാശലംഘന നോട്ടീസ് നല്കി. ശബരിമല ദര്ശനത്തിനെത്തിയ തന്നെ നിലയ്ക്കലില് ഡ്യൂട്ടിയിലുണ്ടായിരുന്ന എസ്പി യതീഷ് ചന്ദ്ര അപമാനിച്ചെന്നും ജനപ്രതിനിധിയെ മോശക്കാരനാക്കാന് ശ്രമിച്ചെന്നുമാണ് ലോക്സഭാ സ്പീക്കര്ക്ക് പൊന് രാധാകൃഷ്ണന് നല്കിയ നോട്ടീസിലുള്ളത്. പരാതി പരിഗണിച്ച് വേണ്ട നടപടികള് സ്വീകരിക്കുമെന്ന് സ്പീക്കര് സുമിത്ര മഹാജന് ലോക്സഭയെ അറിയിച്ചു.
ശബരിമല ദര്ശനത്തിനെത്തിയപ്പോള് തീര്ഥാടകരുടെ സൗകര്യങ്ങള് പരിശോധിച്ച തന്നെ നിലയ്ക്കലില് യതീഷ് ചന്ദ്ര അപമാനിച്ചു. എസ്പി തന്നോട് വളരെയധികം ധിക്കാരപരമായാണ് പെരുമാറിയത്. കേന്ദ്രമന്ത്രിയെന്ന ബഹുമാനം നല്കാതെ ശബ്ദമുയര്ത്തി എതിര്ക്കാന് ശ്രമിച്ചു. വാഹനങ്ങള് പമ്പയിലേക്ക് കടത്തിവിടാത്തത് എന്തെന്ന ചോദ്യത്തിന് ഉത്തരവാദിത്വം ഏറ്റെടുക്കുമോയെന്ന മറുചോദ്യം കൊണ്ട് അപമാനിക്കാന് ശ്രമിച്ചു എന്നിവയാണ് അവകാശലംഘന നോട്ടീസില് ആരോപിക്കുന്നത്. തമിഴ് ശൈലിയിലുള്ള ഇംഗ്ലീഷ് സംസാരിച്ച കേന്ദ്രമന്ത്രിയെ അതേ ഭാഷയില് മറുപടി നല്കി അപഹസിക്കാന് ശ്രമിച്ചെന്ന വിഷയവും സമിതി പരിഗണിക്കുന്നുണ്ട്.
കേന്ദ്രമന്ത്രിയുടെ നോട്ടീസ് സുമിത്ര മഹാജന് അവകാശലംഘന സമിതിക്ക് കൈമാറിയതായി ലോക്സഭാ സ്പീക്കറുടെ ഓഫീസ് അറിയിച്ചു. ഉദ്യോഗസ്ഥനെ വിളിച്ചുവരുത്തേണ്ട തീയതി സമിതി ഉടന് യോഗം ചേര്ന്ന് തീരുമാനിക്കും. നാല്പ്പതുവര്ഷമായി സാധാരണ അയ്യപ്പഭക്തനായി ശബരിമല ദര്ശനം നടത്തുന്ന തനിക്ക് ഇത്തവണ അയ്യപ്പന്മാരുടെ ബുദ്ധിമുട്ടുകളും വേദനയും നേരിട്ട് കണ്ട് മനസ്സിലാക്കാന് സാധിച്ചതായി ലോക്സഭയില് പൊന് രാധാകൃഷ്ണന് പറഞ്ഞു. പൊതുവാഹനങ്ങള് കടത്തിവിടുന്ന സ്ഥലത്ത് എന്തുകൊണ്ട് സ്വകാര്യ വാഹനങ്ങള് കടത്തിവിടുന്നില്ല എന്നു ചോദിച്ചപ്പോള്, ഉത്തരവാദിത്വമേറ്റെടുക്കാമെങ്കില് കടത്തിവിടാമെന്ന പോലീസ് ഉദ്യോഗസ്ഥന്റെ മറുപടി ജനപ്രതിനിധിയോടുള്ള അനാദരവായി കണക്കാക്കണമെന്ന് കേന്ദ്രമന്ത്രി സഭയെ അറിയിച്ചു. വിഷയത്തെ അതീവ ഗൗരവത്തില് കാണുമെന്നാണ് കേന്ദ്രസര്ക്കാര് വ്യക്തമാക്കുന്നത്. കേന്ദ്ര പേഴ്സണല് കാര്യമന്ത്രാലയവും യതീഷ് ചന്ദ്രയുടെ വിവാദ നടപടി പരിശോധിച്ചിരുന്നു.
