കൊച്ചി: ബ്യൂട്ടിപാര്‍ലര്‍ വെടിവയ്‌പ്പ് കേസില്‍ നടി ലീന മരിയ പോള്‍ ഇന്ന് പോലീസിന് മുന്നില്‍ ഹാജരായേക്കും. ഇപ്പോള്‍ ഹൈദരബാദിലുള്ള ലീനയോട് ഉടന്‍ ഹാജരാകാന്‍ പോലീസ് ആവശ്യപ്പെട്ടിരുന്നു. അക്രമത്തില്‍ അധോലോക സംഘത്തലവന്‍ രവി പൂജാരക്ക് പങ്കുണ്ടാകുവാനുള്ള സാധ്യതകള്‍ ലീന തള്ളിക്കളയുന്നില്ല. നേരത്തെ രവി പൂജാരയുടെ പേരില്‍ ഫോണിലൂടെ വിളിച്ച് ഭീഷണിപ്പെടുത്തുകയും 25 കോടി രൂപ ആവശ്യപ്പെടുകയും ചെയ്തിരുന്നു.
ഈ പണം നല്‍കിയില്ല. ഇതിന്മേലുള്ള പകയാവാം ആക്രമണത്തിന് പിന്നില്‍. രവിയെ നേരിട്ട് അറിയില്ലെന്നും ലീന പറഞ്ഞു. ഇക്കാര്യമടക്കമുള്ള വിശദമായ മൊഴിയാകും പോലീസിന് നല്‍കുക. കേസില്‍ ഇതുവരെ കാര്യമായ തെളിവുകള്‍ കണ്ടെത്തുവാന്‍ പോലീസിന് സാധിച്ചിട്ടില്ല. രവി പൂജാരയുടെ പേര് എഴുതിയ കടലാസ് പ്രദേശത്ത് ഉപേക്ഷിച്ചത് കേസ് അന്വേഷണം വഴി തിരിച്ചുവിടുന്നതിനാണെന്നും പോലീസ് സംശയിക്കുന്നു.
ലീനയെ ചോദ്യം ചെയ്താല്‍ വെടിവെയ്‌പ്പ് സംഭവത്തിലേക്ക് വെളിച്ചം വീശുന്ന നിര്‍ണായക തെളിവുകള്‍ ലഭിക്കുമെന്ന പ്രതീക്ഷയിലാണ് അന്വേഷണ സംഘം. കേസ് അന്വേഷിക്കുവാന്‍ രൂപീകരിച്ച പ്രത്യേക സംഘം ബ്യൂട്ടിപാര്‍ലറിലെത്തി വിശദമായ പരിശോധന നടത്തി. കമ്പ്യൂട്ടര്‍ ഹാര്‍ഡ് ഡിസ്‌ക്കുകളും മറ്റ് അനുബന്ധ രേഖകളും തെളിവെടുപ്പിനായി ശേഖരിച്ചിട്ടുണ്ട്. കഴിഞ്ഞ ശനിയാഴ്ച ഉച്ചതിരിഞ്ഞ് മൂന്ന് മണിയോടെയാണ് പനമ്പള്ളി നഗറിലുള്ള ലീനയുടെ നെയില്‍ ആര്‍ട്ടിസ്ട്രി ബ്യൂട്ടിപാര്‍ലറിലേക്ക് ബൈക്കിലെത്തിയ രണ്ടംഗസംഘം നിറയൊഴിച്ചത്. തുടര്‍ന്ന് മുംബൈ അധോലോകത്തലവന്‍ രവി പൂജാരയുടെ പേര് ഹിന്ദിയില്‍ എഴുതിയ കടലാസും സംഭവസ്ഥലത്ത് ഉപേക്ഷിച്ചാണ് അക്രമി സംഘം രക്ഷപ്പെട്ടത്.
കൊച്ചി കേന്ദ്രീകരിച്ച് പ്രവര്‍ത്തിക്കുന്ന അക്രമി സംഘങ്ങളെ പോലിസ് ചോദ്യം ചെയ്തെങ്കിലും കേസിലെ പങ്ക് തെളിയിക്കാനായിട്ടില്ല. തുടര്‍ന്ന് ലീനയ്‌ക്ക് സമീപകാലത്ത് ലഭിച്ച ഭീഷണികളുടെ ചുവട് പിടിച്ചാണ് അന്വേഷണം നടക്കുന്നത്. മാസങ്ങള്‍ക്ക് മുമ്പ് നെറ്റ്കോള്‍ വഴി ഭീഷണി സന്ദേശം വന്നിരുന്നതായി ലീന പറഞ്ഞിരുന്നു. ഇതിന് ഇന്നലെ നടന്ന അതിക്രമവുമായി ബന്ധമുണ്ടോയെന്നും അന്വേഷിക്കുന്നുണ്ട്. ഭീഷണി നിലനില്‍ക്കുന്ന പശ്ചാത്തലത്തില്‍ സംരക്ഷണം ആവശ്യപ്പെട്ട് ഹൈക്കോടതിയെ സമീപിക്കുവാനുള്ള ഒരുക്കത്തിലാണ് ലീന.
