സന്നിധാനം: സന്നിധാനത്തെ നിയന്ത്രണങ്ങളില്‍ ഭാഗിക ഇളവ് വരുത്തി പോലീസ്. ഹൈക്കോടതിയുടെയും മനുഷ്യാവകാശ കമ്മീഷന്റെയും നിര്‍ദേശങ്ങള്‍ക്ക് പിന്നാലെയാണിത്.
ഇന്നലെ പുലര്‍ച്ചെ രണ്ട് മണിയോടെ സന്നിധാനത്ത് താഴെ തിരുമുറ്റത്ത് സ്ഥാപിച്ചിരുന്ന ബാരിക്കേഡുകള്‍ ഭാഗികമായി നീക്കി. വാവര്‍ നടയ്‌ക്ക് മുന്നിലും വടക്കേനടയിലും സ്ഥാപിച്ചിരുന്ന ബാരിക്കേഡുകളാണ് മാറ്റിയത്. ഐജി ദിനേന്ദ്ര കശ്യപ്, ശബരിമല സ്‌പെഷ്യല്‍ കമ്മീഷണര്‍ മനോജ് എന്നിവരുടെ നേതൃത്വത്തില്‍ പരിശോധന നടത്തിയ ശേഷമാണ് നടപടി. സ്റ്റാഫ് ഗേറ്റിന്റെ മുന്‍ഭാഗവും വടക്കെ നടയുടെ ഭാഗത്തെ തുറസായ ഭാഗവും തമ്മില്‍ വേര്‍തിരിച്ച് വടം സ്ഥാപിച്ചു.
തിരക്ക് കൂടിയതോടെ തീര്‍ഥാടകര്‍ക്ക് വിരിവയ്‌ക്കാനുള്ള സൗകര്യം കുറഞ്ഞിരുന്നു. മലിനജലത്തിലും മാലിന്യക്കൂമ്പാരത്തിലുമാണ് വിരിവച്ചിരുന്നത്. ദേവസ്വം ബോര്‍ഡ് ആദ്യം മുതല്‍ തന്നെ നിയന്ത്രണങ്ങള്‍ നീക്കണമെന്ന് ആവശ്യപ്പെട്ട് സര്‍ക്കാരിനെ സമീപിച്ചിരുന്നു. ഹൈക്കോടതി നിയോഗിച്ച നിരീക്ഷണസമിതി സമര്‍പ്പിച്ച റിപ്പോര്‍ട്ടിലും നിയന്ത്രണങ്ങള്‍ നീക്കണമെന്ന് ആവശ്യപ്പെട്ടിരുന്നു. ഇതിന്റെ അടിസ്ഥാനത്തില്‍ ബാരിക്കേഡുകള്‍ നീക്കാന്‍ ഹൈക്കോടതിയും നിര്‍ദേശിച്ചു. കൂടാതെ മനുഷ്യവകാശ കമ്മീഷനും നിന്ത്രണങ്ങള്‍ നീക്കണമെന്ന് നിര്‍ദേശിച്ചിരുന്നു.
ബാരിക്കേഡുകള്‍ ഭാഗികമായി നീക്കിയെങ്കിലും ഉച്ചയ്‌ക്ക് 12 മണിവരെ മാത്രമാണ് നിയന്ത്രണത്തിന് അയവ് വരുത്തിയിട്ടുള്ളത്. ബാരിക്കേഡുകള്‍ നീക്കിയതോടെ ഇന്നലെ മുതല്‍ നൂറുകണക്കിന് തീര്‍ഥാടകരാണ് തിരുമുറ്റത്ത് വിരിവച്ച് വിശ്രമിച്ചത്. എന്നാല്‍, 12 മണിയോടെ ഭക്തരെ അവിടെ നിന്ന് ഒഴിപ്പിച്ചു. നെയ്യഭിഷേകം കഴിയുന്നവരെ മാത്രം വിരിവയ്‌ക്കാന്‍ അനുവദിച്ചാല്‍ മതിയെന്നാണ് പോലീസ് തീരുമാനം. ഇത് അറിയാതെ ഇന്നലെ 12 മണിയോടെ വിരിവച്ച് ഇരുമുടിക്കെട്ടില്‍ നിന്ന് നിവേദ്യ സാധനങ്ങള്‍ വേര്‍തിരിക്കുന്നതിനിടെയാണ് ഭക്തരെ മാറ്റിയത്. പകുതി അഴിച്ച ഇരുമുടിക്കെട്ടും നിവേദ്യ സാധനങ്ങളുമായി ഭക്തര്‍ക്ക് മറ്റിടങ്ങളിലേക്ക് പോകേണ്ടിവന്നു. തിരക്ക് വര്‍ധിക്കുന്നതിനനുസരിച്ച് നിയന്ത്രണങ്ങള്‍ പടിപടിയായി പൂര്‍ണമായും നീക്കുമെന്നാണ് പോലീസ് പറയുന്നത്.
അതേസമയം, ഇന്നലെ രാവിലെ മുതല്‍ പോലീസ് പരിശോധന കര്‍ശനമാക്കിയിട്ടുണ്ട്. എല്ലാ വഴികളിലൂടെയും വരുന്ന ഭക്തരെ കര്‍ശന പരിശോധനകള്‍ക്ക് ശേഷമാണ് കടത്തിവിടുന്നത്. നിലയ്‌ക്കലിലേക്കും വണ്ടിപ്പെരിയാര്‍ വരെ വരുന്ന വാഹനങ്ങളും കര്‍ശനമായി പരിശോധിക്കുന്നുണ്ട്. സംശയമുള്ളവരുടെ വിവരങ്ങളും ശേഖരിക്കുന്നു.
