കൊച്ചി: സ്കൂള് യൂണിഫോമിനൊപ്പം തലയില് തട്ടവും ഫുള്കൈയുള്ള വേഷവും ധരിച്ചെത്തുന്ന കുട്ടികളെ ക്ലാസില് പ്രവേശിപ്പിക്കാന് സ്കൂള് അധികൃതരോടു നിര്ദേശിക്കാനാവില്ലെന്ന് ഹൈക്കോടതി വ്യക്തമാക്കി.
തിരുവനന്തപുരം തിരുവല്ലം ക്രൈസ്റ്റ് നഗര് സീനിയര് സെക്കന്ഡറി സ്കൂളിലെ രണ്ട് വിദ്യാര്ഥിനികളുടെ രക്ഷിതാക്കള് സമര്പ്പിച്ച ഹര്ജി തള്ളിയാണ് ഹൈക്കോടതിയുടെ തീരുമാനം. ഇസ്ലാം മത വിശ്വാസികളായ കുട്ടികള്ക്ക് തട്ടവും ഫുള് കൈ ഷര്ട്ടും ധരിച്ച് ക്ലാസില് പ്രവേശിക്കാന് അനുമതി നല്കണമെന്നായിരുന്നു ആവശ്യം.
വസ്ത്രധാരണത്തിന് സ്വയം തീരുമാനമെടുക്കാന് സ്വാതന്ത്ര്യവും അവകാശവും ഒരാള്ക്കുണ്ടെന്നായിരുന്നു ഹര്ജിക്കാരുടെ വാദം. എന്നാല്, വസ്ത്രധാരണത്തില് ഹര്ജിക്കാരുടെ മക്കള്ക്കുള്ള അവകാശം പോലെ സ്വകാര്യ സ്ഥാപനത്തിന് അതിന്റെ ഭരണനിര്വഹണവുമായി ബന്ധപ്പെട്ട വിഷയങ്ങളില് അവകാശമുണ്ടെന്ന് ഹൈക്കോടതി പറഞ്ഞു. മറ്റുള്ളവരുടെ അവകാശം ഹനിച്ച് ഒരാളുടെ അവകാശം മാത്രമായി സംരക്ഷിക്കാനാവില്ല.
സമൂഹത്തിന്റെ വിശാല താല്പര്യം സംരക്ഷിക്കുന്ന തരത്തിലുള്ള തുല്യ അവകാശമുള്ള സമൂഹത്തെയാണ് ഭരണഘടന വിഭാവനം ചെയ്യുന്നത്. അതിനാല് വ്യക്തി താത്പര്യത്തേക്കാള് സമൂഹത്തിന്റെ താത്പര്യങ്ങള് സംരക്ഷിക്കാന് കോടതികള്ക്ക് ബാധ്യതയുണ്ട്.
വ്യക്തി താത്പര്യം സംരക്ഷിക്കാന് വിശാല താത്പര്യങ്ങള് മറികടക്കുന്നത് കലാപത്തിന് വഴിയൊരുക്കും, ഹൈക്കോടതി ചൂണ്ടിക്കാട്ടി. സ്കൂളിലെ വിദ്യാര്ഥികള്ക്കെല്ലാം ഒരേ വേഷം നിര്ബന്ധമാക്കിയിട്ടുണ്ടെന്നിരിക്കെ വേറിട്ട തരത്തില് വസ്ത്രം ധരിച്ചെത്തുന്ന കുട്ടികളെ ക്ലാസില് പ്രവേശിപ്പിക്കണോയെന്ന് തീരുമാനിക്കേണ്ടത് സ്കൂള് അധികൃതരാണെന്നും സിംഗിള് ബെഞ്ച് വ്യക്തമാക്കി.
