ഓച്ചിറ: വയലിനില്‍ ഹരിവരാസനം വായിച്ച് സാമൂഹികമാധ്യമങ്ങളില്‍ തരംഗമായി മാറിയ അബ്ദുള്‍ അസീസ് ഹമദ് അബ്ദുള്ള കേരളത്തിലെത്തി സ്വകാര്യചടങ്ങിലും അയ്യപ്പന്റെ ഉറക്കുപാട്ട് അവതരിപ്പിച്ചു.
അടുത്തിടെ കുവൈറ്റില്‍ നടന്ന ചടങ്ങില്‍ ഹരിവരാസനം വായിച്ച് സാമൂഹികമാധ്യമങ്ങളില്‍ തരംഗമായിരുന്നു ഇദ്ദേഹം. അബ്ദുള്‍ അസീസ് ഹമദ് അബ്ദുള്ള കായല്‍ഭംഗി ആസ്വദിക്കുവാനാണ് കേരളത്തിലെത്തിയത്. കരുനാഗപ്പള്ളി ശ്രീരാഗ് റെക്കോര്‍ഡിങ് സ്റ്റുഡിയോയില്‍ വച്ച് ജന്മഭൂമിയുമായി കേരളത്തെക്കുറിച്ചും കര്‍ണ്ണാടക സംഗീതത്തെക്കുറിച്ചുമുള്ള ആശയങ്ങള്‍ പങ്കുവെച്ചു.
ലോകത്തിലെ പല രാജ്യങ്ങളും സന്ദര്‍ശിച്ചിട്ടുണ്ടെങ്കിലും തന്നെ ഏറ്റവും കൂടുതല്‍ ആകര്‍ഷിച്ചത് ഭാരതമാണ്. ഈ നാടും സംസ്‌കാരവും ലോകത്തിന് മാതൃകയാണെന്ന് അദ്ദേഹം പറഞ്ഞു.
കുവൈറ്റ് സേനയില്‍ ലഫ്റ്റനന്റ് കേണല്‍ പദവി വഹിക്കുന്ന 38കാരനായ അബ്ദുള്‍ അസീസ് ഹമദ് അബ്ദുള്ളക്ക് ഭാര്യയും നാലു മക്കളുമുണ്ട്. ലണ്ടനിലാണ് വിദ്യാഭ്യാസം പൂര്‍ത്തിയാക്കിയത്. സംഗീതകുടുംബത്തിലാണ് ജനനം. ചെറുപ്പത്തിലേ സംഗീതം അഭ്യസിച്ചു. അറബിക് സംഗീതവും വയലിനുമാണ് ഏറെ താല്പര്യം. കര്‍ണാടക സംഗിതത്തെക്കുറിച്ചുള്ള അന്വേഷണത്തിനിടയിലാണ് വയലിന്‍ വിദ്വാനും അധ്യാപകനുമായ കരുനാഗപ്പള്ളി ബാലമുരളിയെ പരിചയപ്പെടുന്നത്. അദ്ദേഹത്തിന്റെ ശിക്ഷണത്തിലാണ് ഇപ്പോള്‍. അദ്ദേഹത്തോടൊപ്പം ഏതാനും ദിവസം മുന്‍പ് കേരളത്തിലെത്തിയാണ് ചില ചടങ്ങുകളില്‍ പങ്കെടുത്ത് ഹരിവരാസനം വായിച്ചത്.
