തിരുവനന്തപുരം: സിപിഎം നേതാക്കന്മാരുടെ കള്ളത്തരങ്ങള് പുറത്തുകൊണ്ടു വന്നതിനാണ് കെ.സുരേന്ദ്രനെ കള്ളക്കേസില് കുടുക്കി ജയിലില് അടച്ചിരിയ്ക്കുന്നതെന്ന് ബിജെപി സംസ്ഥാന അധ്യക്ഷന് അഡ്വ.പി.എസ് ശ്രീധരന്പിള്ള. ബിജെപി സംസ്ഥാന സെക്രട്ടറി എ.എന് രാധാക്യഷ്ണന് സെക്രട്ടേറിയറ്റിന് മുന്നില് ആരംഭിച്ച നിരാഹാര സമരത്തിന്റെ ഉദ്ഘാടന സമ്മേളനത്തില് സംസാരിക്കുകയായിരുന്നു അദ്ദേഹം.
രാക്ഷസ ഭരണകൂടത്തിന്റെ കണ്ണു തുറപ്പിക്കാനാണ് ഈ നിരാഹാര സമരം. ശബരിമല സമരത്തിന്റെ മൂന്നാംഘട്ടമാണിത്. രണ്ടു ഘട്ടങ്ങളും ജനവിശ്വാസം ആര്ജിച്ചുകൊണ്ട് വിജയിക്കാന് സാധിച്ചു. ശബരിമല കര്മ്മ സമിതി നടത്തുന്ന സമരങ്ങള്ക്ക് ബിജെപി പിന്തുണ നല്കുന്നുണ്ട്. സമരം വ്യാപിപ്പിക്കുകയാണ്. ഗാന്ധിയന് മാര്ഗത്തിലാണ് നിരാഹാര സമരം നടത്തുന്നത്. സമരം വിജയകരമായി പൂര്ത്തീകരിക്കും. മുന്നോട്ട് വച്ച കാല് പിന്നോട്ട് വച്ച ചരിത്രം ബിജെപിയ്ക്കില്ല.
കാട്ടുനീതിയാണ് ഇവിടെ നിലനില്ക്കുന്നത്. കോടതിയെ മാനിക്കാത്ത സര്ക്കാരാണെന്ന് തെളിയിക്കുകയാണ് സംസ്ഥാന സര്ക്കാര്. കേരളത്തില് പോലീസ് രാജ് നടപ്പാക്കുകയാണ്. മാധ്യമ സ്വാതന്ത്ര്യത്തിന് പോലും കൂച്ചുവിലങ്ങിടുകയാണ്. ഇത് ധര്മ്മസമരമാണ്. നീതിയ്ക്കുവേണ്ടിയുള്ള പോരാട്ടമാണ്. ബിജെപി സമരം നിര്ത്തി എന്നത് കല്ലുവച്ച നുണയാണെന്നും പി.എസ് ശ്രീധരന്പിള്ള പറഞ്ഞു.
