അയോധ്യ: രാമജന്മഭൂമിയില് ക്ഷേത്ര നിര്മാണത്തിന് ശംഖൊലി മുഴക്കി ലക്ഷക്കണക്കിന് രാമഭക്തര് അയോധ്യയില്. ഡിസംബറിനുള്ളില് ക്ഷേത്രനിര്മാണത്തിനാവശ്യമായ നിയമം കൊണ്ടുവരണം. ഇല്ലെങ്കില് ആരുടെയും അനുമതിക്ക് കാത്തുനില്ക്കാതെ ക്ഷേത്രനിര്മാണം ആരംഭിക്കാനും വിരാട് ധര്മസഭ ആഹ്വാനം ചെയ്തു. രാമജന്മഭൂമി വീതംവച്ച് നല്കാനാവില്ല. രാംലാലയുടെ 2.77 ഏക്കറും ക്ഷേത്രനിര്മാണത്തിന് വിട്ടുനല്കണം, ധര്മസഭ ആവശ്യപ്പെട്ടു.
ഭാരതത്തിലെ പ്രധാന പരമ്പരകളിലെ ശ്രേഷ്ഠ സംന്യാസിമാര് പങ്കെടുത്ത ധര്മസഭയില് അയോധ്യയിലും സമീപജില്ലകളിലുമുള്ള മൂന്നു ലക്ഷത്തോളം രാമഭക്തര് പങ്കെടുത്തു. 1992ന് ശേഷം ഇതാദ്യമായാണ് രാമജന്മഭൂമിയില് ഇത്രയധികം ശ്രീരാമഭക്തര് സമ്മേളിക്കുന്നത്. രാംലാലയില് നിന്ന് അരക്കിലോമീറ്റര് അകലെയുള്ള ബടാ ഭക്തമാല് പരിക്രമ് മാര്ഗിലെ മൈതാനിയില് ആയിരുന്നു മഹാസമ്മേളനം.
തകര്ക്കപ്പെട്ട ക്ഷേത്രങ്ങള് പുനര്നിര്മിക്കേണ്ടത് ഹൈന്ദവ സമൂഹത്തിന്റെ സ്വാഭിമാനത്തിന്റെ പ്രശ്നമാണെന്നും മുസ്ലിം സംഘടനകളും മുസ്ലിം വഖഫ് ബോര്ഡും ഇക്കാര്യം മനസ്സിലാക്കണമെന്നും അധ്യക്ഷത വഹിച്ച മഹാമണ്ഡലേശ്വര് പരമാനന്ദജി മഹരാജ് പറഞ്ഞു. ക്ഷേത്രനിര്മാണത്തിന് നിയമം പാസാക്കാനുള്ള സമയം സമാഗതമായി. എത്രയും വേഗം ക്ഷേത്രനിര്മാണം ആരംഭിക്കണമെന്ന് മഹന്ത് നൃത്യഗോപാല്ദാസ് ആവശ്യപ്പെട്ടു. അടുത്ത ജനുവരിയില് പ്രയാഗില് നടക്കുന്ന കുംഭമേളയില് രാമക്ഷേത്ര നിര്മാണത്തീയതി പ്രഖ്യാപിക്കുമെന്ന് നിര്മോഹി അഖാഡയിലെ രാംജി ദാസ് പറഞ്ഞു.
ഇനിയും രാമനെ കൂടാരത്തില് കിടത്താന് ഹൈന്ദവ സമാജം അനുവദിക്കില്ലെന്നും രാമഭക്തരുടെ പ്രതിഷേധം കൊടുങ്കാറ്റായി ആഞ്ഞടിക്കുന്നതിന് മുമ്പ് ക്ഷേത്ര നിര്മാണം ആരംഭിക്കുകയാണ് നല്ലതെന്നും അയോധ്യയിലെ പ്രേംശങ്കര്ദാസ്ജി മഹരാജ് പറഞ്ഞു. രാമക്ഷേത്ര നിര്മാണത്തിന് ഡിസംബര് വരെ സമയം നല്കുമെന്നും അതിന് ശേഷം രാമഭക്തര് കാര്യങ്ങള് തീരുമാനിക്കുമെന്നും ആമുഖ പ്രഭാഷണം നടത്തിയ വിഎച്ച്പി ജനറല് സെക്രട്ടറി ചമ്പത് റായി പറഞ്ഞു. ബിജെപി ദേശീയ നേതാക്കളും യുപിയിലെ മന്ത്രിമാരും എംപിമാരും എംഎല്എമാരും ധര്മസഭയുടെ ഭാഗമായി അയോധ്യയിലെത്തി.
കാല്നൂറ്റാണ്ടിന് ശേഷം അയോധ്യയില് നടക്കുന്ന രാമഭക്തരുടെ സമ്മേളനത്തിന്റെ ഭാഗമായി അയോധ്യയിലും മുഴുവന് യുപിയിലും സുരക്ഷ ശക്തമാക്കിയിരുന്നു. അയ്യായിരത്തോളം പോലീസിനെയാണ് രാമജന്മഭൂമിക്ക് സമീപം വിന്യസിച്ചത്. അയോധ്യക്ക് പുറമേ നാഗ്പൂര്, ബെംഗളൂരു തുടങ്ങിയ നഗരങ്ങളിലും രാമജന്മഭൂമിയിലെ ക്ഷേത്ര നിര്മാണത്തിന് ആഹ്വാനം ചെയ്ത് മഹാറാലികള് നടന്നു.
