നിലയ്‌ക്കല്‍: എല്‍ഡിഎഫ്, യുഡിഎഫ് ഒത്തുകളി ഒരിക്കല്‍ കൂടി വെളിവാക്കിക്കൊണ്ട് നിരോധനാജ്ഞ ലംഘിച്ച യുഡിഎഫ് നേതാക്കള്‍ക്ക് പമ്പ ഗണപതികോവിലിന്റെ പടിക്കല്‍ വരെ മുദ്രാവാക്യം വിളിക്കാന്‍ പോലീസ് ഒത്താശ.
വ്രതാനുഷ്ഠാനത്തോടെ ഇരുമുടിക്കെട്ടുമായി അയ്യപ്പദര്‍ശനത്തിനെത്തിയ ശശികല ടീച്ചറേയും കെ. സുരേന്ദ്രനെയും അറസ്റ്റ് ചെയ്ത് ജയിലിലടച്ച പോലീസാണ് യുഡിഎഫ് നേതാക്കളെ പമ്പയിലേക്ക് പോകാന്‍ അനുവദിച്ചത്.
പ്രതിപക്ഷ നേതാവ് രമേശ് ചെന്നിത്തല, മുന്‍ മുഖ്യമന്ത്രി ഉമ്മന്‍ ചാണ്ടി തുടങ്ങിയവരുടെ നേതൃത്വത്തിലാണ് നിരോധനാജ്ഞ ലംഘിക്കുമെന്ന പ്രഖ്യാപനത്തോടെ ഇന്നലെ രാവിലെ നിലയ്‌ക്കലില്‍ എത്തിയത്. ഒരു മണിക്കൂറോളം ഇവര്‍ നിലയ്‌ക്കല്‍ ഇടത്താവളത്തിലേക്കുള്ള പ്രവേശന മാര്‍ഗത്തില്‍ ഗതാഗത തടസ്സമുണ്ടാക്കി.
തീര്‍ഥാടകരുടെ വാഹനങ്ങള്‍ പാര്‍ക്കിങ് ഗ്രൗണ്ടിലേക്ക് പ്രവേശിക്കാന്‍ കഴിയാതായതോടെ പമ്പയിലേക്കുള്ള പാതയിലും വാഹനക്കുരുക്ക് രൂപപ്പെട്ടു. തുടക്കത്തില്‍ ഉച്ചത്തില്‍ ശരണം വിളിച്ച യുഡിഎഫുകാര്‍ പിന്നീട് മുദ്രാവാക്യം വിളിയിലേക്ക് തിരിഞ്ഞു. പിണറായി വിജയനെതിരെയും മുദ്രാവാക്യമുയര്‍ന്നു.
യുഡിഎഫുകാരെ വളഞ്ഞുനിന്നതല്ലാതെ പോലീസ് യാതൊരു നടപടിയും സ്വീകരിച്ചില്ല. എസ് പി യതീഷ്ചന്ദ്ര പലതവണ യുഡിഎഫ് നേതാക്കളെ അനുനയിപ്പിക്കാന്‍ ശ്രമിക്കുന്നുണ്ടായിരുന്നു. ഇതിനിടെ പ്രതിപക്ഷ നേതാവ് കയര്‍ത്തതോടെ എസ്പി മടങ്ങി. ഉന്നത പോലീസ് ഉദ്യോഗസ്ഥരുമായി ബന്ധപ്പെട്ട ശേഷം യുഡിഎഫ് സംഘത്തെ നിലയ്‌ക്കലിലേക്കും തുടര്‍ന്ന് പമ്പയിലേക്കും കടത്തിവിടുകയായിരുന്നു.
നിരോധനാജ്ഞ ഉള്ളതിനാല്‍ നടപടി സ്വീകരിക്കേണ്ടി വരുമെന്ന പോലീസ് മുന്നറിയിപ്പ് യുഡിഎഫുകാര്‍ തള്ളുകയും അറസ്റ്റ് ചെയ്യാന്‍ ആവശ്യപ്പെടുകയുമായിരുന്നു. ഇതോടെ പോലീസ് പിന്മാറി. സര്‍ക്കാര്‍ നിര്‍ദ്ദേശപ്രകാരമാണ് പോലീസ് ഇവരെ അറസ്റ്റ് ചെയ്യാതിരുന്നതെന്ന് വ്യക്തം. ഇതോടെ സര്‍ക്കാരിന്റെ ഒത്തുകളിയും വെളിവായി.
പമ്പയിലേക്ക് രമേശ് ചെന്നിത്തലയും സംഘവും കെഎസ്ആര്‍ടിസി ബസ്സിലാണ് പോയതെങ്കിലും ഇവരുടെ കാറുകളും പമ്പയിലേക്ക് കടത്തിവിട്ടു. മാധ്യമങ്ങളുടേതടക്കം വാഹനങ്ങള്‍ തടയുമ്പോഴാണ് ഇവരുടെ പത്തോളം വാഹനങ്ങള്‍ പമ്പയിലേക്ക് പോയത്. പമ്പയിലെത്തിയ യുഡിഎഫ്സംഘം പമ്പ ഗണപതി കോവിലിന്റെ പടിയില്‍ ധര്‍ണ നടത്തിയതും വിവാദമായി.
ശബരിമല കയറ്റത്തിന്റെ തുടക്കമെന്ന നിലയില്‍ പമ്പാതീരത്തെ ആദ്യപടിക്കെട്ടിന് ഭക്തര്‍ വലിയ പ്രാധാന്യമാണ് നല്‍കുന്നത്. ഇതില്‍ കര്‍പ്പൂരം കത്തിച്ച് വണങ്ങിയാണ് ഭക്തര്‍ മലകയറുന്നത്. ഇവിടെ ധര്‍ണ നടത്തിയത് ഭക്തര്‍ക്കിടയില്‍ പ്രതിഷേധത്തിനും കാരണമായി.
