ഇടുക്കി: തെക്കുപടിഞ്ഞാറന് ബംഗാള് ഉള്ക്കടലില് രൂപം കൊണ്ട ന്യൂനമര്ദം സംസ്ഥാനത്തെ കാര്യമായി ബാധിക്കില്ലെന്ന് നിഗമനം. എന്നാല് തിരുവനന്തപുരത്ത് മഴ തുടരാനാണ് സാധ്യത. മറ്റ് ജില്ലകളില് യെല്ലോ അലര്ട്ട് പിന്വലിച്ചെങ്കിലും ഇന്നും നാളെയും തിരുവനന്തപുരത്ത് തുടരും.
കന്യാകുമാരിയില് കടല് പ്രക്ഷുബ്ധമായിരിക്കുകയാണെന്നും ഇവിടെ മത്സ്യബന്ധനത്തിന് പോകരുതെന്നും തിരുവനന്തപുരത്തെ കേന്ദ്ര അന്തരീക്ഷ ശാസ്ത്രകേന്ദ്രം വ്യക്തമാക്കി. അടുത്തിടെ ആരംഭിച്ച ചുഴലിക്കാറ്റ് നിരീക്ഷണ കേന്ദ്രത്തിന്റെ സഹായത്തോടെയാണ് നിരീക്ഷണം.
നിലവില് ശ്രിലങ്കയിലും തെക്കുപടിഞ്ഞാറന് ബംഗാള് ഉള്ക്കടലിലും ഇന്ത്യന് മഹാസമുദ്രത്തിന്റെ മധ്യഭാഗത്തുമാണ് ന്യൂനമര്ദമുള്ളത്. സമുദ്രനിരപ്പില് നിന്ന് 5.8 കിലോമീറ്റര് ഉയരത്തിലാണ് ഇതിന്റെ ചംക്രമണം . ഈ മേഖലയില് ശക്തമായ കാറ്റുമുണ്ട്. രണ്ട് ദിവസത്തിനുള്ളില് ഇത് കന്യാകുമാരിയില് നിന്ന് പടിഞ്ഞാറോട്ട് നീങ്ങും. കാലവര്ഷം എത്തിയെങ്കിലും സംസ്ഥാനത്ത് മഴയുടെ ശക്തി കുറഞ്ഞു. ഇന്നലെ രാവിലെ അവസാനിച്ച 24 മണിക്കൂറിനിടെ എറണാകുളം സൗത്തില് മൂന്നരയും എയര്പോര്ട്ടില് രണ്ടും സെ.മീ വീതം മഴ ലഭിച്ചു. തിരുവനന്തപുരം എയര്പോര്ട്ടില് ഒരു സെ.മീ മഴ ലഭിച്ചപ്പോള് മറ്റിടങ്ങളില് ചെറിയതോതില് പോലും പെയ്തിട്ടില്ല.
