സന്നിധാനം: ശബരിമലയിലെ ആചാരങ്ങള് ലംഘിച്ച് ദേവസ്വം ബോര്ഡ് അംഗം കെ.പി. ശങ്കരദാസ്. പതിനെട്ടാംപടി ഇരുമുടിക്കെട്ടില്ലാതെ കയറിയാണ് അദ്ദേഹത്തിന്റെ ആചാരലംഘനം.
കഴിഞ്ഞ ദിവസം ചിത്തിര ആട്ടവിശേഷത്തിനായി നട തുറന്ന സമയത്താണ് ശങ്കരദാസ് മേല്ശാന്തിക്കൊപ്പം പതിനെട്ടാംപടി കയറിയത്. ആഴി തെളിയിക്കാന് പടിയിറങ്ങിയ മേല്ശാന്തി, തിരിച്ചു കയറിയപ്പോള് ശങ്കരദാസും കൂടെക്കയറി. ക്ഷേത്രങ്ങളിലെ ആചാരങ്ങള് മാനിക്കുമെന്ന് സത്യപ്രതിജ്ഞ ചെയ്ത് അധികാരമേറ്റ ദേവസ്വം ബോര്ഡ് പ്രതിനിധി തന്നെ ആചാരങ്ങള് ലംഘിച്ചത് വന് വിവാദത്തിനിടയാക്കി.
ഇന്നലെ രാവിലെ ദര്ശനത്തിനെത്തിയ ഭക്തകളുടെ പ്രായത്തെച്ചൊല്ലിയുണ്ടായ തര്ക്കത്തിനിടെ ഭക്തരെ നിയന്ത്രിക്കാന് ശബരിമല കര്മസമിതി നേതാവ് വത്സന് തില്ലങ്കേരി പതിനെട്ടാംപടിയിലെത്തി. ഇതിനെതിരെ ശങ്കരദാസ് രംഗത്തെത്തി. ഇരുമുടിക്കെട്ടില്ലാതെ തിരിച്ചിറങ്ങിയത് ആചാരലംഘനമാണെന്നും ഇക്കാര്യത്തില് അന്വേഷണം നടത്തുമെന്നും ശങ്കരദാസ് പ്രഖ്യാപിച്ചു. അതിന് പിന്നാലെയാണ് ശങ്കരദാസ് ഇരുമുടിക്കെട്ടില്ലാതെ പതിനെട്ടാംപടി കയറിയിറങ്ങുന്ന ദൃശ്യം പുറത്തുവന്നത്.
ആചാരലംഘനം നടത്തിയിട്ടില്ലെന്നും ആരോപണങ്ങള് സര്ക്കാരും ദേവസ്വം ബോര്ഡും ഭക്തരോട് കാട്ടിയ അവകാശലംഘനങ്ങള് മറയ്ക്കാനാണെന്നും വത്സന് തില്ലങ്കരി പറഞ്ഞു. സിസി ടിവി ദൃശ്യങ്ങള് പരിശോധിക്കണമെന്നും അദ്ദേഹം ആവശ്യപ്പെട്ടു.
ആചാരലംധനമെന്ന് തന്ത്രി
ശബരിമല: ഇരുമുടിക്കെട്ടില്ലാതെ പതിനെട്ടാംപടി കയറുന്നത് ആചാരലംഘനമെന്ന് തന്ത്രി കണ്ഠര് രാജീവര്. ആചാരങ്ങള് പ്രകാരം തന്ത്രിക്കും മേല്ശാന്തിക്കും പന്തളം രാജകുടുംബത്തിനും മാത്രമേ ഇരുമുടിക്കെട്ടില്ലാതെ പതിനെട്ടാംപടി കയറാനാകൂ. ഇവരല്ലാതെ ആരെങ്കിലും ഇരുമുടിക്കെട്ടില്ലാതെ പതിനെട്ടാംപടി കയറിയാല് ആചാരലംഘനമാണ്. ഇതുമായി ബന്ധപ്പെട്ട് പരാതി വന്നാല് ആവശ്യമായ പരിഹാരക്രിയകള് നടത്തുമെന്നും തന്ത്രി അറിയിച്ചു.
