വിജയവാഡ: ആന്ധ്രപ്രദേശിലെ കെഎല് യൂണിവേഴ്സിറ്റിയില്വച്ച് നടക്കുന്ന സൗത്ത്സോണ് അന്തര് സര്വകലാശാല വനിതാ വോളിബോള് യോഗ്യതാ മത്സരത്തില് മദ്രാസ് യൂണിവേഴ്സിറ്റിയെ നേരിട്ടുള്ള സെറ്റുകള്ക്ക് പരാജയപ്പെടുത്തി (26-24, 25-16, 25-22) കോട്ടയം മഹാത്മാഗാന്ധി സര്വകലാശാല അഖിലേന്ത്യാ അന്തര് സര്വകലാശാല മത്സരത്തിന് യോഗ്യതനേടി.
ഡിസംബറില് രാജസ്ഥാനില്വച്ചാണ് അഖിലേന്ത്യാ അന്തര്സര്വകലാശാല മത്സരം. കണ്ണൂര് സര്വകലാശാലയെ പരാജയപ്പെടുത്തി ഭാരതീയര് കോയമ്പത്തൂര്, കാലിക്കറ്റ് സര്വകലാശാലയെ പരാജയപ്പെടുത്തി മൈസൂര്, ഹിന്ദുസ്ഥാന് സര്വകലാശാലയെ പരാജപ്പെടുത്തി എസ്ആര്എം സര്വകലാശാലയും യോഗ്യത നേടി. കേരളത്തില്നിന്നും എംജി യൂണിവേഴ്സിറ്റി മാത്രമാണ് യോഗ്യത നേടിയത്. തുടര്ച്ചയായ ഏഴാം തവണയാണ് എംജി സര്വകലാശാല അഖിലേന്ത്യാ അന്തര്സര്വകലാശാല വോളിബോള് മത്സരത്തിന് യോഗ്യത നേടുന്നത്.
ആദ്യ ലീഗ് മത്സരത്തില് എംജി കോട്ടയം ഭാരതീയര് കോയമ്പത്തൂരിനെയും പരാജയപ്പെടുത്തിയിരുന്നു.ഇന്ന് രാവിലെ എംജി, മൈസൂറിനേയും എസ്ആര്എം ഭാരതിയറിനെയും വൈകുന്നേരം എംജിഎസ്ആര്എമ്മുമായും മൈസൂര് ഭാരതിയറുമായും മത്സരിക്കും. മത്സരങ്ങള് ഇന്ന് അവസാനിക്കും.
