തിരുവനന്തപുരം: സാലറി ചലഞ്ചില് ബിഎംസ് നേതൃത്വത്തിലുള്ള എന്ജിഒ സംഘ് സമര്പ്പിച്ച ഹര്ജിയില് സുപ്രീം കോടതി ഇന്ന് പുറപ്പെടുവിച്ച വിധി ഇടതുമുന്നണി സര്ക്കാരിനും ധനമന്ത്രിയ്ക്കും കനത്ത തിരിച്ചടിയാണെന്ന് ബിജെപി സംസ്ഥാന അദ്ധ്യക്ഷന് അഡ്വ. പിഎസ് ശ്രീധരന് പിള്ള. സര്ക്കാര് ജീവനക്കാരുടെ ആത്മാഭിമാനം തകര്ക്കുന്ന വിസമ്മത പത്രത്തിനെതിരെയുള്ള പരമോന്നത കോടതിയുടെ വിധിയുടെ വെളിച്ചത്തില് ധനമന്ത്രി തോമസ് ഐസക് രാജിവെക്കണമെന്ന് ബിജെപി ആവശ്യപ്പെടുന്നുവെന്നും അദ്ദേഹം പറഞ്ഞു.
വിസമ്മത പത്രത്തിനെതിരെ വിധി വന്നതിനെ തുടര്ന്ന് ഇനി സമ്മത പത്രം സമര്പ്പിച്ചിരുന്നവരില് നിന്നും ധനം സമാഹരിക്കും എന്നാണ് ധന മന്ത്രി പറയുന്നത്. ഇതിനുള്ള അധികാരമോ അവകാശമോ ഇനി സര്ക്കാരിനില്ല. ജീവനക്കാര്ക്ക് സര്ക്കാര് സമ്മതപത്രം വിതരണം ചെയ്തിട്ടില്ല. ചില യൂണിയനുകള് വിതരണം ചെയ്ത സമ്മതപത്രമാണ് സര്ക്കാരിന് ലഭിച്ചിട്ടുള്ളത്.
ഇനി സര്ക്കാരിന് അഭികാമ്യമായുള്ളത് മൊത്തം ജീവനക്കാര്ക്ക് സര്ക്കാര് തന്നെ നേരിട്ട് വിതരണം ചെയ്ത് സമ്മതപത്രം പുതുതായി സ്വീകരിക്കുക മാത്രമാണ്. ഹൈക്കോടതിയില് നിന്നും വിധിയുണ്ടായിട്ടും സുപ്രീം കോടതിയെ സമീപിപ്പിച്ച ഇടതുമുന്നണി സര്ക്കാരിന്റെ ദുര്വാശി ഇനിയെങ്കിലും ഉപേക്ഷിക്കണമെന്ന് ബിജെപി ആവശ്യപ്പെടുന്നുവെന്നും അദ്ദേഹം പറഞ്ഞു.
