തൃശൂര് : ശബരിമലയെ കലാപഭൂമിയാക്കാനാണ് പിണറായി സര്ക്കാര് ശ്രമിക്കുന്നതെന്ന് ബിജെപി സംസ്ഥാന പ്രസിഡന്റ് അഡ്വ.പി.എസ്. ശ്രീധരന് പിള്ള. ശബരിമല ക്ഷേത്രത്തിനെതിരെ വര്ഷങ്ങളായി തുടരുന്ന ഗൂഢാലോചനയുടെ ഭാഗമാണ് ഇപ്പോഴത്തെ വിവാദങ്ങളും. നൂറ്റാണ്ടുകളായി തുടരുന്ന ആചാരങ്ങള് സംരക്ഷിക്കണമെന്ന വിശ്വാസികളുടെ താത്പര്യത്തിനൊപ്പമാണ് ബിജെപി. സര്ക്കാര് പിടിവാശി തുടരുന്ന സാഹചര്യത്തില് വിശ്വാസികള് നടത്തുന്ന ധര്മസമരത്തിന് ബിജെപി എല്ലാ പിന്തുണയും നല്കുമെന്നും ശ്രീധരന് പിള്ള പറഞ്ഞു. തൃശൂര് പ്രസ്ക്ലബ്ബില് മുഖാമുഖത്തില് സംസാരിക്കുകയായിരുന്നു.
ശബരിമലയിലെ ഇപ്പോഴത്തെ വിവാദങ്ങള് കേരളത്തില് മാത്രം ഒതുങ്ങുന്നതല്ല. ലോകത്തെ ഏറ്റവും വലിയ തീര്ഥാടനകേന്ദ്രമാണ് ശബരിമല. ചര്ച്ചക്കെന്ന പേരില് തിരുവിതാംകൂര് ദേവസ്വം ബോര്ഡ് തന്ത്രങ്ങള് പ്രയോഗിക്കുകയാണ്. ഹിന്ദുസമൂഹത്തില് ഭിന്നിപ്പ് സൃഷ്ടിച്ച് സമരത്തെ തകര്ക്കാനാണ് സിപിഎമ്മും ദേവസ്വം ബോര്ഡും ശ്രമിക്കുന്നത്.
ശബരിമല വിഷയത്തില് എന്നും ഭക്തരെ വഞ്ചിച്ച പാരമ്പര്യമാണ് കോണ്ഗ്രസിനുള്ളത്. ഇക്കുറിയും അതാവര്ത്തിക്കുകയാണ്. ആദ്യഘട്ടത്തില് പരസ്യമായി രംഗത്തുവന്ന കോണ്ഗ്രസ് ഇപ്പോള് ഒളിച്ചുകളിക്കുന്നത് എന്തുകൊണ്ടാണെന്നും ശ്രീധരന് പിള്ള ചോദിച്ചു.
വിശ്വാസികളായ 95 ശതമാനം സ്ത്രീകളും വേണ്ടെന്ന് പറഞ്ഞിട്ടും യുവതീപ്രവേശനത്തിന്റെ കാര്യത്തില് മുഖ്യമന്ത്രിയും സിപിഎം നേതൃത്വവും കാണിക്കുന്ന പിടിവാശി ദുഷ്ടലാക്കോടെയാണ്.ശബരിമലയില് സമാധാനം നിലനില്ക്കണമെന്നാണ് ഭൂരിപക്ഷം വരുന്ന വിശ്വാസിസമൂഹത്തിന്റെ താത്പര്യം. സര്ക്കാര് പിടിവാശി ഉപേക്ഷിച്ച് റിവ്യൂഹര്ജി നല്കിയാല് തീരാവുന്ന പ്രശ്നമേ ഇപ്പോഴുള്ളു. സര്ക്കാര് നിലപാടില് പ്രതിഷേധിച്ച് ഇന്ന് പത്തനംതിട്ടയില് ഉപവാസസമരം നയിക്കുമെന്നും അദ്ദേഹം പറഞ്ഞു.
