കണ്ണൂര്: കേരളത്തിലെ ക്ഷേത്രാചാരങ്ങള് കോടതികളില് തീരുമാനിക്കുന്ന പ്രവണത ആശാസ്യമല്ലെന്ന് അഖിലകേരള തന്ത്രിസമാജം ഉത്തരമേഖലാ സമ്മേളനത്തില് പറഞ്ഞു.
ക്ഷേത്രമെന്നത് കേവലമൊരു ആരാധനാലയം എന്ന സങ്കല്പത്തിലൊതുങ്ങുന്നതല്ല. ഓരോ ക്ഷേത്രത്തിലും ഈശ്വരന് വ്യത്യസ്തമായ വ്യക്തിത്വങ്ങളാണ് ഉള്ളത്. അമ്പലപ്പുഴയിലും ഗുരുവായൂരിലും തൃച്ഛംബരത്തും കൃഷ്ണന് തന്നെയാണ് പ്രതിഷ്ഠ. എങ്കിലും മൂന്നിടത്തും ദേവന്റെ വ്യക്തിത്വം വ്യത്യസ്തമാണ്.
ഗുരുവായൂരില് ആനയോട്ടം പോലുള്ള ചടങ്ങുകള് ഉത്സവത്തിന്റെ ഭാഗമാണെങ്കില് തൃച്ഛംബരത്ത് കൃഷ്ണന് ആനയെ കാണുകപോലുമരുതെന്നാണ് സങ്കല്പം. ഒരേ ദേവന് മുന്നിടത്ത് മുന്ന് വ്യക്തിത്വമാകുന്നതുതന്നെയാണ് അവിടങ്ങളിലെ ആചാരങ്ങളെയും വ്യത്യസ്തമാക്കുന്നത്.
ക്ഷേത്രങ്ങളെ പൊതു ഇടം എന്ന നിര്വ്വചനത്തില്നിന്ന് മാറ്റണം. ക്ഷേത്രം വിശ്വാസികള്ക്കുള്ളതാണ്. ആചാരങ്ങളെ പാലിക്കുകതന്നെ ചെയ്യും. വിശ്വാസ സമൂഹത്തിന്റെ ആശങ്ക കണക്കിലെടുക്കാതെ ധൃതിപ്പെട്ട് കോടതിവിധി നടപ്പാക്കാനുള്ള സര്ക്കാര് നടപടി അപലപനീയമാണെന്നും സമ്മേളനത്തില് അവതരിപ്പിച്ച പ്രമേയത്തില് പറയുന്നു. ഇരവില് കൃഷ്ണദാസ് വാഴുന്നവര് ഉദ്ഘാടനം ചെയ്തു. കാട്ടുമാടം ഈശാനന് നമ്പൂതിരിപ്പാട് അധ്യക്ഷതവഹിച്ചു.
ഭാരവാഹികളായി ഇരവില് പത്മനാഭന് വാഴുന്നവര് (പ്രസിഡണ്ട്), ഏറാഞ്ചേരി ഹരിഗോവിന്ദന് നമ്പൂതിരി (വൈസ് പ്രസിഡണ്ട്), ഇടവലത്ത് പുടയൂര് ജയനാരായണന് നമ്പൂതിരിപ്പാട് (സെക്രട്ടറി), കുന്നം ജയകൃഷ്ണന് നമ്പൂതിരി (ജോ.സെക്രട്ടറി), എടക്കഴുപ്പിരം രമേശന് നമ്പൂതിരി (ട്രഷറര്) എന്നിവരെ തെരഞ്ഞെടുത്തു.
