കൊച്ചി: മഹാപ്രളയത്തില് ദുരിതാശ്വാസ പ്രവര്ത്തനത്തിനിറങ്ങിയ മത്സ്യത്തൊഴിലാളികളെ ആദരിച്ച് കേരള ബ്ലാസ്റ്റേഴ്സ്. ഇന്നലെ മുംബൈ സിറ്റിക്കെതിരെ നടന്ന മത്സരത്തിന് തൊട്ടു മുന്പായിരുന്നു ആദരം.നിറഞ്ഞുകവിഞ്ഞ ഗ്യാലറിക്ക് മുന്നില് ടീം ഉടമ നിമ്മഗദ പ്രസാദ്, ബ്രാന്ഡ് അംബാസഡര് മോഹന്ലാല് എന്നിവരുടെ സാന്നിധ്യത്തിലായിരുന്നു ആദരം. രക്ഷകരോടുള്ള ആദരസൂചകമായി പ്രത്യേക ജഴ്സിയിലാണ് ബ്ലാസ്റ്റേഴ്സ് സ്വന്തം മൈതാനത്തെ ആദ്യ മത്സരത്തിനിറങ്ങിയത്. രക്ഷാപ്രവര്ത്തനത്തിലേര്പ്പെട്ട മത്സ്യത്തൊഴിലാളികളുടെയും നാവികസേനയുടെയും ചിത്രങ്ങളായിരുന്നു ജേഴ്സിയില് ഇടംപിടിച്ചത്.
‘ഒരുമ ഞങ്ങളുടെ പെരുമ’ എന്നെഴുതിയ ബാനറായിരുന്നു മത്സരത്തിന് മുന്നോടിയായി ദേശീയഗാനത്തിനായി ഇരുടീമുകളും അണിനിരന്നപ്പോള് ഗ്യാലറിയില് ഉയര്ന്ന ബാനറിലെ വാചകം. വഞ്ചിയില് കേരളത്തെ സുരക്ഷിതമായിരുത്തി ചുമന്നുപോകുന്ന മത്സ്യത്തൊഴിലാളികള്, മുകളില് വട്ടമിട്ടു പറക്കുന്ന നാവികസേനയുടെ ഹെലികോപ്ടര്… ഇതായിരുന്നു അതിനൊപ്പം ഉയര്ന്ന ബാനറിലെ ദൃശ്യം. കേരളത്തെ ദുരിതക്കയത്തില് മുക്കിയ മഹാപ്രളയവും അതിനെ ഒറ്റക്കെട്ടായി അതിജീവിച്ച ജനതയുടെ ഇച്ഛാശക്തിയും രക്ഷകരായവരോടുള്ള നിറഞ്ഞ സ്നേഹവുമായിരുന്നു ചിത്രവും വരികളും. ബ്ലാസ്റ്റേഴ്സ് ആരാധക കൂട്ടായ്മയായ മഞ്ഞപ്പടയാണ് അതിജീവന പാതയിലെ കേരളത്തിന്റെ ഒത്തൊരുമ ഫുട്ബാള് ലോകത്തിനു കാണിച്ചുകൊടുത്തത്.
