എഴുത്തുകാരില് പുരുഷന്മാരും സ്ത്രീകളും ഉണ്ട്. എഴുത്തുകാരന്മാരിലും പുരുഷന്മാരും സ്ത്രീകളും ഉണ്ടോ? ചില ലേഖകര് അങ്ങനെ സംശയിക്കുന്നുണ്ടാകാം. നോക്കുക:
”മിനി കൃഷ്ണനുമായുള്ള അഭിമുഖത്തില് ഐറിസ് മാര്ഡോക്കിനെപ്പറ്റി പറയുമ്പോള് പുരുഷ എഴുത്തുകാരനാണ് എന്ന സൂചനയാണ് ഉള്ളത്”
ഒരു വാരികയില് കണ്ട വാക്യമാണിത്. പുരുഷനാണ് എന്നോ എഴുത്തുകാരനാണ് എന്നോ എഴുതേണ്ടതിനു പകരമാണ് ഈ പുതിയ പ്രയോഗം. ഇക്കൂട്ടര് ഇനി ‘സ്ത്രീ എഴുത്തുകാരി’ എന്നു പ്രയോഗിച്ചേക്കാം.
”യുവ വനിതാ ശാസ്ത്രജ്ഞകള്ക്ക് പുരസ്കാരം നല്കുന്നു” എന്നൊരു വാര്ത്ത ഈയിടെ ഒരു പത്രത്തില് വായിച്ചതോര്ക്കുന്നു.
”ഉദ്യോഗാര്ത്ഥികള്ക്ക് കുറഞ്ഞത് മൂന്നുവര്ഷത്തെ അധ്യയന പരിചയം ഉണ്ടായിരിക്കണം” അധ്യാപക നിയമനത്തിന് അപേക്ഷ ക്ഷണിച്ചുകൊണ്ട് ഒരു പ്രമുഖ സ്വകാര്യ വിദ്യാഭ്യാസ സ്ഥാപനം കൊടുത്ത പരസ്യത്തിലേതാണ് ഈ വാക്യം.
അധ്യാപന പരിചയമാണ് ഉദ്ദേശിച്ചിരിക്കുന്നത്. അധ്യായനം എന്നാല് പഠനമാണ്. അധ്യാപനം എന്നാല് പഠിപ്പിക്കല്.
ഓരോ വാര്ഡുതോറും ശാസ്ത്രീയമായ ശുചീകരണ സംവിധാനം ഉണ്ടാക്കണമെന്ന് യോഗം അധികൃതരോടാവശ്യപ്പെട്ടു.
‘ഓരോ’യും ‘തോറും’ കൂടി വേണ്ട.
”ഓരോ വാര്ഡിലും ശാസ്ത്രീയമായ ശുചീകരണ സംവിധാനം ഉണ്ടാക്കണമെന്ന് യോഗം അധികൃതരോടാവശ്യപ്പെട്ടു” (ശരി)
”വാര്ഡ്തോറും ശാസ്ത്രീയമായ ശുചീകരണ സംവിധാനം ഉണ്ടാക്കണമെന്ന് യോഗം അധികൃതരോടാവശ്യപ്പെട്ടു” (ശരി)
”അപകടത്തെക്കുറിച്ചറിഞ്ഞപ്പോള് അയാള് മൂര്ച്ചിച്ചു വീണു”
മൂര്ച്ഛയാണ് ഇവിടെ മൂര്ച്ചയായത്.
മൂര്ച്ഛ= മോഹാലസ്യം, ബോധക്കേട്.
മൂര്ച്ച= മുറിക്കാനുള്ള കഴിവ്.
ആ ബ്ലേഡിന് ഒട്ടും മൂര്ച്ചയില്ല. (ശരി)
”വേറെ ഗത്യന്തരമില്ലാത്തതുകൊണ്ടാണ് അവന് ആ ജോലി സ്വീകരിച്ചത്”
ഈ വാക്യത്തിലെ ‘വേറെ’ അന്തരം എന്നിവയ്ക്ക് ഒരേ അര്ത്ഥമാണ്.
വേറെ ഗതിയില്ലാത്തതുകൊണ്ടാണ് അവന് ആ ജോലി സ്വീകരിച്ചത്. (ശരി).
ഗത്യന്തരമില്ലാത്തതുകൊണ്ടാണ് അവന് ആ ജോലി സ്വീകരിച്ചത് (ശരി).
”സ്ത്രീ പീഡനക്കേസുകളുടെ അന്വേഷണത്തില് കാണിക്കുന്ന അനാസ്ഥ സര്ക്കാരിലുള്ള വിശ്വാസ്യതയെ ബാധിക്കുമെന്ന് യോഗം അഭിപ്രായപ്പെട്ടു.”
”സര്ക്കാരിലുള്ള വിശ്വാസത്തെ” എന്നോ ”സര്ക്കാരിന്റെ വിശ്വാസ്യതയെ” എന്നോ പ്രയോഗിച്ചാലേ വാക്യം ശരിയാകൂ.
”ഭരണത്തിലെത്തിയ പാര്ട്ടികളോടോ മുന്നണികളോടോ ഉള്ള വിധേയത്വമാണ് പല എഴുത്തുകാര്ക്കുമുള്ളത്” ഒരു പ്രമുഖ എഴുത്തുകാരന്റെ അഭിപ്രായമാണിത്. ‘ഉള്ള’യുടെ ആവര്ത്തനം കൊണ്ടുണ്ടാകുന്ന വിരസത രണ്ടുവിധത്തില് ഒഴിവാക്കാം.
‘ഭരണത്തിലെത്തിയ പാര്ട്ടികളോടോ മുന്നണികളോടോ വിധേയത്വമാണ് പല എഴുത്തുകാര്ക്കുമുള്ളത്”
”ഭരണത്തിലെത്തിയ പാര്ട്ടികളോടോ മുന്നണികളോടോ വിധേയത്വമുള്ളവരാണ് പല എഴുത്തുകാരും”
‘വെള്ളപ്പൊക്കം പലേടത്തും കൃഷി പാടേ നശിക്കാന് സഹായകമായി”
‘സഹായകമായി’ എന്ന പ്രയോഗം ഇവിടെ ഉചിതമല്ല. സംഭവിച്ചത് നല്ലകാര്യമാണെങ്കിലേ ‘സഹായകമായി’ ഉചിതമാവൂ.
”വെള്ളപ്പൊക്കം പലേടത്തും കൃഷി പാടേ നശിക്കാന് കാരണമായി” (ശരി).
”പലിശയില്ലാ വായ്പ ദുരിതങ്ങളില്നിന്ന് കരകയറാന് കര്ഷകര്ക്ക് സഹായകമായി” (ശരി)
വിലയുടെ പത്തു ശതമാനമേ ഗുണദാതാക്കളില്നിന്ന് ഈടാക്കു എന്ന് സര്ക്കാര് അറിയിച്ചു.
ഗുണഭോക്താക്കള് എന്നാണ് വേണ്ടത്. ഗുണദാതാക്കള് ഗുണം നല്കുന്നവരാണ്.
പിന്കുറിപ്പ്:
പ്രളയമല്ല, പ്രകൃതിയുടെ പ്രണയത്തിന്റെ കവിഞ്ഞൊഴുകലാണ് കേരളം കണ്ടതെന്ന് ഒരു പ്രളയ നിരൂപകന്.
വരള്ച്ചയിലും പ്രളയസാഹിത്യം തഴച്ചുവളരുകയാണ്!
എസ്കെ
