സതീഷ് ചെറിയനാട്
കൊച്ചി: മുഖ്യമന്ത്രി പിണറായി വിജയന്റെ അഭാവത്തില്‍ ഗതാഗത വകുപ്പില്‍ സ്ഥലം മാറ്റത്തിന് പിടിവലി. ചില എന്‍സിപി നേതാക്കള്‍ വന്‍തുക കോഴ വാങ്ങിയാണ് സ്ഥലം മാറ്റം നടത്തുന്നത്.
സ്ഥലംമാറ്റം ലഭിക്കുന്ന ആള്‍ രണ്ടു വര്‍ഷം അതേ സ്ഥലത്ത് തുടരണമെന്നാണ് ചട്ടം . എന്നാല്‍ ഇപ്പോള്‍ രണ്ടു മാസം കഴിഞ്ഞവര്‍ പോലും തങ്ങള്‍ക്കിഷ്ടമുള്ള സ്ഥലത്തേക്ക് സ്ഥലം മാറാന്‍ നീക്കം നടത്തുകയാണ്.
മുഖ്യമന്ത്രി ചികിത്സയ്‌ക്കായി അമേരിക്കയിലേക്ക് പോയതോടെ സംസ്ഥാനത്ത് ഭരണം ആകെ കുത്തഴിഞ്ഞു. ഈ അവസരം മുതലാക്കാനാണ് എന്‍സിപിക്കാരുടെ നീക്കം. ഇതിന് ഗതാഗത മന്ത്രി എ.കെ. ശശീന്ദ്രന്റെ അനുയായികള്‍ മന്ത്രിയില്‍ വലിയ സമ്മര്‍ദമാണ് ചെലുത്തുന്നത്.
പ്രതിസന്ധി ഘട്ടത്തില്‍ ഒപ്പം നിന്ന നേതാക്കളെ കൈയൊഴിയാന്‍ സാധിക്കാത്തതിനാല്‍ എ.കെ. ശശീന്ദ്രന്‍ നേതാക്കളുടെ സമ്മര്‍ദത്തിന് വഴങ്ങി പല സ്ഥലമാറ്റങ്ങളും നടപ്പാക്കി തുടങ്ങിയിട്ടുണ്ട്. ഇതോടൊപ്പം തോമസ് ചാണ്ടി വിഭാഗവും ശുപാര്‍ശയുമായി എത്തിയിട്ടുണ്ട്. മന്ത്രി സ്ഥാനത്തിന് ഭീഷണിയുണ്ടാകാതിരിക്കാന്‍ ഇവര്‍ക്കു വേണ്ടിയും മന്ത്രി വഴങ്ങുന്നുണ്ട്.
