പൊന്കുന്നം: കാഞ്ഞിരപ്പള്ളി ഡിവൈഎസ്പി ഇമ്മാനുവല് പോളിനെ തിരുവനന്തപുരം റെയില്വേ ഡിസിആര്ബിയിലേക്ക് സ്ഥലം മാറ്റി. ചിറക്കടവ് മേഖലയിലെ സംഘര്ഷങ്ങളുടെ പശ്ചാത്തലത്തിലാണ് സ്ഥലംമാറ്റം. പകരം തിരുവനന്തപുരത്തുനിന്ന് എസ്. മധുസൂദനനാണ് കാഞ്ഞിരപ്പള്ളി ഡിവൈഎസ്പിയായി എത്തുന്നത്.
നിലവില് പൊതുവായ സ്ഥലംമാറ്റങ്ങള് നടക്കാത്ത സാഹചര്യത്തില് അടിയന്തര സ്ഥലംമാറ്റത്തിന് പിന്നില് രാഷ്ട്രീയലക്ഷ്യമാണെന്നാണ് ആരോപണം. ചിറക്കടവ് മേഖലയില് സിപിഎം നടത്തുന്ന അക്രമങ്ങള്ക്ക് അനുകൂല നിലപാട് സ്വീകരിക്കാത്തതാണ് ഡിവൈഎസ്പിയുടെ സ്ഥാനചലനത്തിന് കാരണമെന്നും ആക്ഷേപമുയരുന്നു. വകുപ്പുതല അച്ചടക്ക നടപടിക്കുള്ള പ്രശ്നങ്ങള് കാഞ്ഞിരപ്പള്ളി മേഖലയില് ഇല്ലെന്നാണ് പോലീസ്സേനയ്ക്കുള്ളിലെ അഭിപ്രായം. യാതൊരുവിധ രാഷ്ട്രീയ സമ്മര്ദ്ദവും പോലീസിന് മേല് ചെലുത്തില്ലെന്നും കേസന്വേഷണത്തില് നിഷ്പക്ഷ നിലപാടെടുക്കാന് പോലീസിന് പൂര്ണസ്വാതന്ത്ര്യമുണ്ടെന്നും പ്രസംഗം നടത്തുന്ന മുഖ്യമന്ത്രിയെ അപഹാസ്യനാക്കുന്ന നടപടിയാണ് കാഞ്ഞിരപ്പള്ളി ഡിവൈഎസ്പിയുടെ സ്ഥലംമാറ്റം.
കഴിഞ്ഞ ദിവസം നിയമസഭയില് പ്രശ്നം ചര്ച്ചയായതോടെ മറുപടിയുമായി മുഖ്യമന്ത്രി പിണറായി വിജയന് രംഗത്തെത്തിയിരുന്നു. ഇതോടെ പോലീസ് ഉദ്യോഗസ്ഥര്ക്ക് സ്ഥാനചലനമുണ്ടാവുമെന്ന് ആഭ്യന്തരവകുപ്പില്നിന്ന് സൂചനയുയര്ന്നിരുന്നു.
രണ്ടു ഡസനോളം പോലീസുകാരുടെ സാന്നിധ്യത്തില് ആര്എസ്എസ് പ്രവര്ത്തകരെ വെട്ടിയ സിപിഎം പ്രവര്ത്തകന് മുകേഷ് മുരളിയെ അറസ്റ്റ്ചെയ്ത സിഐ സി.ആര്. പ്രമോദിനെ ഒരാഴ്ചയ്ക്കകം സ്ഥലംമാറ്റിയിരുന്നു. പകരം കെ.ആര്. മോഹന്ദാസിനെ നിയോഗിച്ചു.
