മോസ്കോ: സെര്ബിയക്കെതിരായ മത്സരത്തിനിടെ ബ്രസീല് പ്രതിരോധനിര താരം മാഴ്സലോക്ക് പരിക്കേറ്റു. കളിയുടെ 10-ാം മിനിറ്റില് പരിക്കേറ്റ താരം മുടന്തിയാണ് കളം വിട്ടത്. എന്നാല് പരിക്ക് സാരമുള്ളതല്ലെന്നും ഉടന് തിരിച്ചെത്തുമെന്നും താരം ട്വിറ്ററില് കുറിച്ചു. എന്നാല് മെക്സിക്കോക്കെതിരായ പ്രീ ക്വാര്ട്ടറില് കളിക്കാനിറങ്ങാന് കഴിയുമോ എന്ന കാര്യം മാഴ്സലോ വ്യക്തമാക്കിയിട്ടില്ല. ലോകകപ്പില് ബ്രസീലിന്റെ കിരീട പ്രതീക്ഷകള്ക്ക് ചുക്കാന് പിടിക്കുന്ന താരങ്ങളിലൊരാളായ മാഴ്സലോ ലോകത്തെ മികച്ച അറ്റാക്കിങ് ലെഫ്റ്റ് ബാക്കായാണ് അറിയപ്പെടുന്നത്.
അതിനിടെ, മാഴ്സലോയ്ക്ക് എങ്ങനെയാണ് പരിക്കേറ്റതെന്ന് വ്യക്തമാക്കി ബ്രസീലിയന് ടീമിന്റെ ഡോക്ടര് റോഡ്രിഗോ ലാസ്മാര് രംഗത്തെത്തി. കളിക്കിടയിലോ പരിശീലനസമയത്തോ അല്ല മാഴ്സലോക്ക് പരിക്കേറ്റതെന്ന് അദ്ദേഹം പറയുന്നു. പകരം റഷ്യയില് ടീം താമസിച്ച ഹോട്ടലിലെ കിടക്കയുടെ പ്രശ്നമാണ് റയല് മാഡ്രിഡ് താരത്തെ കുടുക്കിയതെന്നാണ് ലാസ്മാര് പറയുന്നത്. ഇത് മൂലമുണ്ടായ നടുവേദനയാണ് മാഴ്സലോയുടെ പ്രശ്നം. മറ്റുള്ള പരിക്ക് പോലെ എത്ര നാള് താരം പുറത്തിരിക്കേണ്ടി വരുമെന്നൊന്നും ഇതിന് പറയാനാകില്ല. പരിശോധനകളും ചികിത്സകളും നടത്തുന്നുണ്ട്. നടുവിന്റെ വേദന മാറുന്നതോടെ താരത്തിന് പരിശീലനം തുടങ്ങാന് സാധിക്കും. മാഴ്സലോയ്ക്ക് പരിക്കുകള് ഇല്ലെന്നും മസിലുകള്ക്ക് വേദന മാത്രമാണെന്നും ലാസ്മാര് കൂട്ടിച്ചേര്ത്തു.
