ഡോങ്കേ സിറ്റി (ദക്ഷിണ കൊറിയ): നിലവിലെ ചാമ്പ്യന്മാരായ ഇന്ത്യയെ അഞ്ചാമത് ഏഷ്യന് ചാമ്പ്യന്സ് ഹോക്കി ടൂര്ണമെന്റ് റൗണ്ട് റോബിന് ലീഗിലെ അവസാന മത്സരത്തില് ആതിഥേയരായ ദക്ഷിണ കൊറിയ സമനിലയില് തളച്ചു (1-1).
അവസാന മത്സരത്തില് സമനില വഴങ്ങിയെങ്കിലും ഇന്ത്യ തോല്വിയറിയാതെ ഫൈനലിലെത്തി. ഇന്ന് നടക്കുന്ന കപ്പിനായുള്ള പോരാട്ടത്തില് ഇന്ത്യയും ദക്ഷിണ കൊറിയയും ഏറ്റുമുട്ടും.
നാല് മത്സരങ്ങളില് മൂന്നെണ്ണത്തില് വിജയവും ഒരു സമനിലയും നേടിയാണ് ഇന്ത്യ പോയിന്റ് നിലയില് മുന്നിലെത്തി ഫൈനലില് കടന്നത്. ആദ്യ മത്സരത്തില് ജപ്പാനെയും (4-1), രണ്ടാം മത്സരത്തില് ചൈനയേയും ( 3-1) മൂന്നാം മത്സരത്തില് മലേഷ്യയേയും (3-2) ഇന്ത്യ തോല്പ്പിച്ചു. ദക്ഷിണ കൊറിയ രണ്ടാം സ്ഥാനക്കാരായി. നാല് മത്സരങ്ങളില് രണ്ട് ജയവും രണ്ട് സമനിലയും നേടി.
അവസാന ലീഗ് മത്സരത്തില് ദക്ഷിണ കൊറിയയാണ് ആദ്യ ഗോള് നേടിയത്. സീയൂള് കീ ചിയോണാണ് സ്കോര് ചെയ്തത്. ഏറെ താമസിയാതെ ലാല്റംസിയാനി ഗോള് മടക്കി ഇന്ത്യക്ക് സമനിലയൊരുക്കി.
