തിരുവനന്തപുരം: സംവരണത്തിന് അര്ഹതയുളള വിഭാഗങ്ങള്ക്ക് അര്ഹമായ തോതിലും കൃത്യമായും അതു ലഭിക്കുന്നുണ്ടെന്ന് ഉറപ്പാക്കാന് സര്ക്കാര് പരിശോധന നടത്തുമെന്ന് മുഖ്യമന്ത്രി പിണറായി വിജയന് പറഞ്ഞു. എന്നാല് സംവരണം കൊണ്ട് എല്ലാ പ്രശ്നങ്ങളും പരിഹരിക്കപ്പെടില്ല. മുഖ്യമന്ത്രി പറഞ്ഞു.
സര്ക്കാരിന്റെ രണ്ടാം വാര്ഷികത്തിന്റെ ഭാഗമായി ഹിന്ദുസമുദായ സംഘടനകളുടെ പ്രതിനിധികളുമായി സംസാരിക്കുകയായിരുന്നു മുഖ്യമന്ത്രി. ജോലി സംവരണം നല്കുന്ന കാര്യത്തില് വ്യത്യസ്ത അഭിപ്രായങ്ങളുണ്ട്. തീരെ സംവരണം വേണ്ട എന്ന നിലപാടിനോട് സര്ക്കാരിന് യോജിപ്പില്ല.
സിവില് സര്വീസ് മെച്ചപ്പെടുത്താന് കേരള അഡ്മിനിസ്ട്രേറ്റീവ് സര്വീസ് രൂപീകരിക്കുമ്പോള് മൂന്ന് തരത്തിലാണ് ഉദ്യോഗസ്ഥരെ തെരഞ്ഞെടുക്കുന്നത്. ഓപ്പണ് വിഭാഗം, സര്ക്കാര് ഉദ്യോഗസ്ഥരുടെ ട്രാന്സ്ഫര് നിയമനം, സ്ഥാനക്കയറ്റം മുഖേനയുള്ള നിയമനം എന്നിങ്ങനെയാണത്. സര്ക്കാര് സര്വീസിലെത്തുന്നവര്ക്ക് സംവരണത്തിന്റെ ആനുകൂല്യം ലഭിക്കുന്നതിനാല് രണ്ടും മൂന്നും വിഭാഗങ്ങളിലുളളവര്ക്ക് കെഎഎസില് സംവരണം നല്കാന് കഴിയില്ലെന്നാണ് അഡ്വക്കേറ്റ് ജനറലിന്റെ ഉപദേശമെന്ന് മുഖ്യമന്ത്രി അറിയിച്ചു.
