ഒറ്റനമ്പര്‍ ചൂതാട്ടം നടത്തുന്ന സംഘത്തെ പോലീസ് അറസ്റ്റ് ചെയ്തു

ചക്കരക്കല്ല്: ഒറ്റനമ്പര്‍ ചൂതാട്ടം നടത്തുന്ന സംഘത്തെ പോലീസ് അറസ്റ്റ് ചെയ്തു. ഓണ്‍ലൈന്‍ ലോട്ടറി തട്ടിപ്പിലെ മുഖ്യകണ്ണികളായ ആറ്റടപ്പ മുട്ടോളം പാറയിലെ വിനോദ് (50), മാറോളിയിലെ സി.രതീഷ് (34), മുഴപ്പിലങ്ങാട്ടെ പി.ദീപേഷ് (38) എന്നിവരെയാണ് ചക്കരക്കല്ല് എസ്‌ഐ പി.ബിജുവിന്റെയും എസ്പിയുടെ ഷാഡോ സംഘവും പിടികൂടിയത്. വിനോദിന്റെ തങ്കേക്കുന്നിലുള്ള വീട്ടില്‍ നടത്തിയ റെയ്ഡില്‍ കമ്പ്യൂട്ടറുകള്‍, ലാപ്‌ടോപ്പുകള്‍, നിരവധി മൊബൈല്‍ ഫോണുകള്‍ എന്നിവ കണ്ടെടുത്തിട്ടുണ്ട്. വീടിന്റെ ഒരുമുറി ചൂതാട്ട കേന്ദ്രത്തിന്റെ ഓഫീസായി പ്രവര്‍ത്തിക്കുന്നുവെന്നാണ് പോലീസ് പറയുന്നത്. ഇവിടെ രണ്ട് ജീവനക്കാര്‍ ജോലി ചെയ്യുന്നുണ്ട്. റെയ്ഡില്‍ 3,80,000 രൂപയാണ് പിടിച്ചെടുത്തത്. വിനോദിന്റെ ഉടമസ്ഥതയില്‍ കണ്ണൂര്‍ നഗരത്തില്‍ നാല് ലോട്ടറി സ്റ്റാളുകള്‍ പ്രവര്‍ത്തിക്കുന്നതായി പോലീസിന് വിവരം കിട്ടിയിട്ടുണ്ട്. ഈ ലോട്ടറി സ്റ്റാളുകള്‍ കേന്ദ്രീകരിച്ചാണ് ഓണ്‍ലൈന്‍ ലോട്ടറി ചൂതാട്ടം നടത്തുന്നത്. പ്രതികളെ ഇന്ന് കോടതിയില്‍ ഹാജരാക്കും.