കൂത്തുപറമ്പ്: മെരുവമ്പായിയില് ബിജെപി പ്രവര്ത്തകനെ സിപിഎം സംഘം അക്രമിച്ച് കൊലപ്പെടുത്താന് ശ്രമിച്ച കേസില് സിപിഎമ്മും പോലീസും ഒത്തുകളിക്കുന്നു. അക്രമം നടന്ന് ദിവസങ്ങളായെങ്കിലും കേസില് ഇതുവരെ ആരെയും അറസ്റ്റ് ചെയ്തിട്ടില്ല. നീര്വ്വേലി ശ്രീരാമസ്വാമി ക്ഷേത്രത്തിന് സമീപത്തെ കനീഷിനെയാണ് കഴിഞ്ഞ ദിവസം മെരുവമ്പായി പാലത്തിന് സമീപത്ത് സിപിഎം സംഘം അക്രമിച്ച് കൊലപ്പെടുത്താന് ശ്രമിച്ചത്. പ്രതികളെക്കുറിച്ച് സംഭവദിവസം തന്നെ കൃത്യമായ സൂചന ലഭിച്ചിരുന്നു. എന്നാല് സംഭവവുമായി ബന്ധപ്പെട്ട് ഒരാളെ പോലും ഇതുവരെ അറസ്റ്റ് ചെയ്തിട്ടില്ല.
കഴിഞ്ഞ ദിവസം സിപിഎമ്മിന്റെ നേതൃത്വത്തില് നീര്വ്വേലിയില് നടന്ന പൊതുയോഗത്തില് അക്രമത്തില് പങ്കെടുത്ത സിപിഎമ്മുകാരും പങ്കെടുത്തിരുന്നു. പോലീസിന്റെ സാന്നിധ്യത്തില് നടന്ന പൊതുയോഗ സ്ഥലത്ത് പ്രതികളുടെ സാന്നിധ്യമുണ്ടായിട്ടും ആരെയും അറസ്റ്റ് ചെയ്യാത്തതില് പ്രദേശത്ത് പ്രതിഷേധം വ്യാപകമാണ്. ഭരണത്തിന്റെ തണലില് പ്രതികള്ക്ക് പോലീസ് ഒത്താശ ചെയ്ത് കൊടുക്കുകയാണെന്നും ഇവരെ നിയമത്തിന് മുന്നില് കൊണ്ടുവന്നില്ലെങ്കില് ശക്തമായ പ്രക്ഷോഭ പരിപാടികള് ആരംഭിക്കുമെന്നും ബിജെപി നേതൃത്വം വ്യക്തമാക്കി.
