കണ്ണൂര്: കേരള സാമൂഹ്യ സുരക്ഷാ മിഷന്റെ ആഭിമുഖ്യത്തില് നടപ്പിലാക്കുന്ന ധ്വനി പദ്ധതിയുടെ സംസ്ഥാന തല ഉദ്ഘാടനം മന്ത്രി കെ.കെ.ശൈലജ നിര്വഹിച്ചു. തലശ്ശേരി ജനറല് ആശുപത്രിയില് നടന്ന ചടങ്ങില് ‘ഇനി എല്ലാവരും കേള്ക്കട്ടെ’ ക്യാമ്പയിന്റെ ഉദ്ഘാടനവും മന്ത്രി നിര്വഹിച്ചു. കോക്ലിയര് ഇംപ്ലാന്റേഷന് നടത്തി കേള്വി തിരിച്ചുകിട്ടിയ കുട്ടികള്ക്ക് കേള്വിശക്തി നിലനിര്ത്താന് തുടര്ച്ചയായ പ്രോസസ് അപ്ഗ്രേഡ് ചെയ്യുന്നതിന് ലക്ഷ്യമിടുന്നതാണ് ധ്വനി പദ്ധതി. അഞ്ച് ലക്ഷം രൂപ വില വരുന്ന ഉപകരണങ്ങള് സൗജന്യമായാണ് പദ്ധതിയിലൂടെ സര്ക്കാര് നല്കുന്നത്.
അഡ്വ.എ.എന്.ഷംസീര് എംഎല്എ അധ്യക്ഷത വഹിച്ചു. തലശ്ശേരി നഗരസഭാ ചെയര്മാന് സി.കെ.രമേശന്, ഡെപ്യൂട്ടി ഡിഎംഒ ഡോ.എ.ടി.മനോജ്, ജില്ലാ സാമൂഹ്യനീതി ഓഫീസര് പവിത്രന് തൈക്കണ്ടി, കൗണ്സിലര് റുബ്സീന, വിവിധ രാഷ്ട്രീയ പാര്ട്ടി പ്രതിനിധികള് തുടങ്ങിയവര് സംസാരിച്ചു. കേരള സാമൂഹ്യ സുരക്ഷാ മിഷന് എക്സിക്യുട്ടീവ് ഡയറക്ടര് ഡോ.ബി.മുഹമ്മദ് അഷീല് സ്വാഗതവും സൂപ്രണ്ട് ഡോ.എം.പീയൂഷ് നമ്പൂതിരിപ്പാട് നന്ദിയും പറഞ്ഞു.
