കണ്ണൂര്: സംസ്ഥാന ലൈബ്രറി കൗണ്സില് സംഘടിപ്പിക്കുന്ന ദക്ഷിണേന്ത്യന് സാംസ്കാരികോത്സവം മാര്ച്ച് രണ്ട്, മൂന്ന്, നാല് തിയ്യതികളില് കണ്ണൂരില് നടക്കുമെന്ന് സംഘാടകര് വാര്ത്താസമ്മേളനത്തില് അറിയിച്ചു.
വിവിധ ജില്ലകളില് നിന്നും മറ്റ് സംസ്ഥാനങ്ങളില് നിന്നുമുള്ള ഇരുന്നൂറ് പ്രതിനിധികളും ജില്ലയിലെ ആയിരം പ്രതിനിധികളും സാംസ്കാരികോത്സവത്തില് പങ്കെടുക്കും. രണ്ടിന് കാലത്ത് പത്തിന് ടൗണ്സ്ക്വയറില് സെമിനാര് സെഷനോടെ പരിപാടികള് ആരംഭിക്കും. വൈകീട്ട് ആറിന് ടൗണ്സ്ക്വയറില് കര്ണാടക സാഹിത്യ അക്കാദമി പുരസ്കാര ജേതാവ് കെ.എസ്.ഭഗവാന് ഉദ്ഘാടനം ചെയ്യും. എംപിമാരായ പി.കെ.ശ്രീമതി, കെ.കെ.രാഗേഷ്, ഫോക്ലോര് അക്കാദമി ചെയര്മാന് സി.ജെ.കുട്ടപ്പന് തുടങ്ങിയവര് പങ്കെടുക്കും. തുടര്ന്ന് ഫോക്ലോര് അക്കാദമി അവതരിപ്പിക്കുന്ന മെഗാഷോ അരങ്ങേറും. വിവിധ ദിവസങ്ങളില് ഏഴ് സെമിനാറുകളിലായി 25 പ്രബന്ധങ്ങള് അവതരിപ്പിക്കും. രണ്ടിന് കാലത്ത് പത്തിന് ലൈബ്രറി കൗണ്സില് സംസ്ഥാന പ്രസിഡന്റ് ഡോ.കെ.വി.കുഞ്ഞികൃഷ്ണന് ഉദ്ഘാടനം ചെയ്യും. തുടര്ന്ന് ഫോക്ലോറും പ്രതിരോധവും, ബാലസാഹിത്യത്തിലെ പുതിയ പ്രവണതകള് എന്നീ വിഷയങ്ങളില് സെമിനാര് നടക്കും.
മൂന്നിന് രാവിലെ 9.30 ന് മുനിസിപ്പല് ഹയര്സെക്കണ്ടറി സ്കൂളില് നടക്കുന്ന സെമിനാര് മന്ത്രി രാമചന്ദ്രന് കടന്നപ്പള്ളി ഉദ്ഘാടനം ചെയ്യും. എഴുത്ത് സംസ്ക്കാരം, പ്രതിരോധം, നാടകം സംസ്കാരം പ്രതിരോധം എന്നീ വിഷയങ്ങളില് സെമിനാര് വനടക്കും. വൈകീട്ട് ആറിന് ടൗണ് സ്ക്വയറില് സാംസ്കാരിക സമ്മേളനം മന്ത്രി എ.കെ.ബാലന് ഉദ്ഘാടനം ചെയ്യും. വിവിധ കലാപരിപാടികള് അരങ്ങേറും. നാലിന് കാലത്ത് ഒമ്പതരക്ക് കേരളത്തിലെ അക്കാദമികളും ഗ്രന്ഥശാലകളും, വനിതകളും സാംസ്കാരിക പ്രവര്ത്തനവും എന്നീ വിഷയങ്ങളില് സെമിനാര് നടക്കും. വൈകീട്ട് അഞ്ചിന് വനിതകളുടെ മെഗാതിരുവാതിര അരങ്ങേറും. വൈകീട്ട് അഞ്ചരക്ക് സമാപന സമ്മേളനം പിന്നണി ഗായകന് വി.ടി.മുരളി ഉദ്ഘാടനം ചെയ്യും. വാര്ത്താസമ്മേളനത്തില് ജില്ലാ പഞ്ചായത്ത് പ്രസിഡന്റ് കെ.വി.സുമേഷ്, പി.കെ.ബൈജു, കവിയൂര് രാജഗോപാലന് എന്നിവര് പങ്കെടുത്തു.
