തിരുവനന്തപുരം: 2020-24 ഒളിമ്പിക്സിനുവേണ്ടി കായികതാരങ്ങളെ കണ്ടെത്താനായി ഗ്യാസ് അതോറിറ്റി ഓഫ് ഇന്ത്യ(ഗെയില്)യും നാഷണല് യുവ കോ-ഓപ്പറേറ്റീവ് സൊസൈറ്റിയും ചേര്ന്ന് നടത്തുന്ന ഇന്ത്യന് സ്പീഡ് സ്റ്റാര് സീസണ് 3 അത്ലറ്റിക് ടൈം ട്രയല്സ് തിരുവനന്തപുരം, കൊല്ലം, പത്തനംതിട്ട എന്നീ ജില്ലകള് ഉള്പ്പെടുന്ന തിരുവനന്തപുരം മേഖലാ തെരഞ്ഞെടുപ്പ് നാളെ യൂണിവേഴ്സിറ്റി സ്റ്റേഡിയം ഗ്രൗണ്ടില് നടക്കും.
11 മുതല് 14 വയസ്സ്, 15 മുതല് 17 വയസ്സ് എന്നീ വിഭാഗങ്ങളായി ആണ്-പെണ് കുട്ടികള്ക്ക് പങ്കെടുക്കാം. 100, 200, 400 മീറ്റര് സ്പ്രിന്റ് ഇനങ്ങളിലാണ് മത്സരം. കേരളത്തില് തിരുവനന്തപുരം, പാലക്കാട്, കണ്ണൂര്, മലപ്പുറം, കോതമംഗലം എന്നിവയാണ് ട്രയല് കേന്ദ്രങ്ങള്.
ജില്ലാ തെരഞ്ഞെടുപ്പിനുശേഷം എറണാകുളത്ത് നടക്കുന്ന സ്റ്റേറ്റ് തെരഞ്ഞെടുപ്പും തുടര്ന്ന് ദേശീയ തെരഞ്ഞെടുപ്പും വിജയകരമായി പൂര്ത്തീകരിക്കുന്ന അത്ലറ്റുകളെ ഗെയില് മികച്ച പരിശീലനത്തിനായി സ്പോണ്സര് ചെയ്യും. അവര്ക്ക് വിദേശ കോച്ചുകളുടെ സഹായത്തോടെയുള്ള ക്യാമ്പ്, അന്താരാഷ്ട്ര മത്സരം, സ്പോര്ട്സ് കിറ്റ്, സപ്ലിമെന്റ് ഡയറ്റ് എന്നീ സൗകര്യങ്ങള് ലഭിക്കും. കൂടാതെ അത്ലറ്റുകള്ക്ക് സ്വന്തം സ്ഥലങ്ങളില് വച്ചുതന്നെ പരിശീലനം തുടരാം.
